NCC (NER) Rally for Cadets lo hmuak

NCC North Eastern Region (NER) Rally for Cadets-a telte chuan November 8, Nilaini khan Aizawl an rawn thleng a, Governor Dr Hari Babu Kambhampati-a'n Raj Bhavan-ah a lo hmuak.

Rally hi November 6-26, 2023 chhung neih tur a ni a, hmarchhak state hrang hrangah ‘Inpumkhatna leh thununna’ tih thupui hmangin km. 3,500 vela thui an zin kual dawn a ni.

Aizawla rawn thleng NCC NER Rally for Cadet-a telte hi Shillong aṭangin NCC NER Maj.Gen. Gagan Deep-a'n a rawn hruai a; lirthei 12 hmangin an kal a, hmun hrang hrangah ṭhalaite nen hun an hmang ṭhin dawn a ni.

Governor chuan, ṭhalaite hmasawnna tur leh ram leh hnam inpumkhatna atan NCC-in hna an thawh nasat thu sawiin, "Mizorama ṭhalaite hi NCC-ah a tel ṭha pawl leh ṭhahnemngai taka thawktu zinga mi an niin ka hria. Lungleiah 2 Mizoram Bn. NCC a awm leh tâk hnuah Mizo ṭhalaite tan NCC-a tel theihna a inhawng zau sawt a ni," a ti.

Dr Hari Babu Kambhampati chuan, NCC chuan ṭhalaite chu mi puitling, khua leh tui ṭhaah a chher ṭhin thu leh sipaia luh tumte tan chauh lo pawh inhmanna hmun ṭha a nih thu a sawi bawk.