Covid-19 Mizoram dinhmun
August 14, Zirtawpni aṭanga nimin thleng khan Covid-19 vei mi eng emaw zat hmuh chhuah belh a ni. Hetih lai hian, Inrinni khan hripui vei zinga dam tawh mi pariat chhuahtir an ni a, nimin khan mi 15 an chhuak ve leh bawk.
Nimin zinga sorkar (IPR dept.) thuchhuakin a tarlan chinah, Mizorama Covid-19 kai hmuh tawh zat chu mi 777 an ni a; chutih laiin, Vairengte checkgate-a swab sample endiknaah sorkarin a tarlan hman loh an awm nual a, hei vang hian hripui vei hmuh chhuah tawh hi mi 780 an chuang tawha hriat a ni. Covid-19 vei hmuh tawh zinga mi 371 chu an dam tawh avangin chhuahtir an ni tawh a, mi 406 an la chhuak lo. La chhuak lo zingah hripui vei tawh lo an awm nual bawk.
August 14, Zirtawpnia Covid-19 vei hmuh chhuahte chu - Zoram Medical College (ZMC)-ah mi 26, Lunglei Civil Hospital (LCH) laboratory-ah mi pathum leh Rapid Antigen Test (RAT) hmangin Aizawlah pakhat an ni. RAT hmanga hmuh chhuah zat hi Vanglaini-in August 15, Inrinni thlenga a tarlan hman loh zat a ni. ZMC laboratory-a sample 344 endik zinga hripui vei hmuh chhuah mi 26 zingah naupang kum 12 leh 14 mi pakhat ve ve telin, mi dangte chu puitling an ni a, mi 22 chu Mizoram pawn aṭanga rawn lut niin, pali erawh chu Mizorama mi dang aṭanga kai an ni thung.
LCH laboratory-a TrueNAT-PCR hmanga August 14-a mi 27 endik zingah mi pathumin Covid-19 an vei tih hmuh chhuah a ni a, an pathum hian state páwn aṭanga rawn haw, khung hran lai an ni. RAT hmanga Aizawla hripui vei hmuh chhuah pawh state pawn aṭanga rawn haw, kum 36 mi a ni. August 15, Inrinni khan ZMC-ah Covid-19 vei mi 50 hmuh chhuah a ni a, LCH laboratory-a mi 21 endik zinga hripui vei hmuh an awm lo. Assam lam aṭanga lirtheia rawn lutte Vairengte checkgate-a RAT hmanga endiknaah, Inrinnia chhuak Vanglainia tarlan hman loh chinah, Zirtawpni tlai dar 5 aṭanga nimin tlai dar 5 thleng khan hripui vei mi 16 hmuh belh a ni a, hnam dang driver leh handyman vek an ni.
ZMC-a Covid-19 vei hmuh chhuahte chu Aizawl district mi vek niin, naupang kum 7 leh 9 mi an tel a, a bak chu kum 17-56 an ni. An zinga mi paruk chu Mizoram chhunga mi dang aṭanga kai niin, khung hran mek an ni a; mi dang zawng chu state páwn aṭanga lo let niin, sipai 40 an tel. Vairengte checkgate-ah hian August 10, 2020 tlai aṭangin Assam aṭanga rawn lut zawng zawng RAT hmangin endik an ni a, nimin tlai dar 5 thleng khan Covid-19 vei mi 48 hmuh chhuah tawh niin, hnam dang driver/handyman 47 leh Mizo (Excise duty) pakhat an ni.
Inrinnia Covid-19 vei dam tawh chhuahtirte chu CCC, Zokhawsang aṭangin Assam Rifles mi pasarih leh CCC, Berawtlang aṭangin BSF mi pakhat an ni a; nimina chhuahtirte chu State Referral Hospital aṭangin BSF mi pali leh civil mi pakhat, CCC Lengpui aṭangin mi pahnih, CCC Tribal Art Centre aṭangin mi panga, CCC Thenzawl aṭangin mi pahnih leh DCHC Serchhip aṭangin mi pakhat an ni.