Doctor-te'n inkhàrkhip zel an duh Fimkhur lehzuala kalpui ṭul an ti

IMA Mizoram president Dr Rosangluaia chuan, inkhàrkhip chhunzawm ṭha a tih thu Vanglaini palai zawhna chhángin a sawi a, "Phai aṭangin kan Mizopuite an rawn haw ṭan a, quarantine centre-a an awm hun a tàwp hun a awm dawn. Mizoramah Covid-19 kai leh kai loh 100%-a finfiahna a awm si lo a, chuvangin, kan fimkhur deuh deuh a ṭul. Hriat lohin kan inkai darh palh ang tih a hlauhawm," a ti.

Medical lam aṭanga thlir chuan inkhàrkhip mek dan chu a khauh lo mah maha a hriat thu sawiin Dr Rosangluaia chuan, "Chutih rualin, sorkar chuan economy a thlir ve a ngai si. Tuna kan kalphung ang pawh hian mipui fimkhur ila a duhawm hle," a ti a; mi tam tak chu an fimkhur lo mah mah tawha a hriat thu a sawi.

Dr Rosangluaia chuan, Mizoramah Covid-19 kai hmuh chhuah a nih rih loh avangin thlamuan chi a nih loh thu sawiin, "Covid-19 hluarna state aṭangtein an rawn haw ṭan bakah, kan ṭhenawmah a darh nasa. Chuvangin, rawn haw turte an rawn haw kim a, ni 14 quarantine a zawhah ni 14 dang a ral leh hunah nunphung pangngaia nun ngam theih turah kan ngai a, nunphung pangngaia nun hmanhmawh chi a ni lo," a ti.

Vanglaini palai zawhna chhangin MGDA president Dr Chawngthanchhunga chuan, inkharkhip chu pawhsei ṭha an tih thu a sawi a, "Chutih rual chuan, mirethei zawkte'n an zo tawh ang em, an buai phah lutuk tawh ang em, tih erawh ngaihtuah a ngai. State páwn aṭangin rawn haw an awm mek avangin fimkhur zual a ngai hle," tiin, a hma aia fimkhur leh zual ngaia a hriat thu a sawi.

Dr Chawngthanchhunga chuan, social distancing leh hmai tuam uar a ṭul thu sawiin, "Social distancing hi Mizote chuan zawm kan harsat hle. Chuvangin, social distancing-ah hian khauh zawkin kal ila a duhawm hle a, community spread a awm palh a hlauhawm. Social distancing leh mask vuah uar ila chuan kan economy thlirin, tuna inkhàrkhip kalphung anga kal pawh a tâwkna chin a awm," a ti.

Covid-19 vanga inkharkhip thawh lina, May 18-a hman ṭan chu May 31 hian a tàwp dawn a, sorkar chuan inkhàrkhip pawhsei leh pawhsei lohah thutlukna a la siam lo a ni.