Independence Day vawi 74-na lawm a ni

August 15, Inrinni khan Mizoram hmun hrang hrangah Independence Day vawi 74-na lawm a ni. State khaw­pui Aizawlah chuan zing dar 8-ah Lammualah lawm a ni a, chief minister Zoramthanga'n hnam puanzar a pawt pharh.

CM Zoramthanga chuan, Mizoram mipuite Inde­pendence Day (I-Day) chibai bûkin, Mizorama pawl hrang hrang, kohhran leh mipui chungah sorkar an thawhpui avangin lawmthu a sawi a, "Vawiinah hian, zalenna sualtu mi huaisen leh kan ram siamtute hmathlir chawi nung a, vawng him a, tipuitling zel turin inhlàn thar ila, an thisen leh thlan tui a thlàwnin i luan raltir lo ang u," a ti a; Mizoram hmasawnna, remna leh muanna vawng nung zel turin mi tin a sáwm.

Beisei loh lam aṭangin mipui rúntu hripui hlauhawm takin ram pum a tuam mek tih sawiin Zoramthanga chuan, "Kan him tlanna tura inkaihhruaina dante leh mi thiamte thurâwn ngai pawimawh a, kan zawm tlat chuan hripui lakah kan him zel ang," a ti a; tun hnaia ṭum eng emaw zat lirnghingin a sâwite leh lirnghing vanga in chhiate chu a tawrhpui thu a sawi.

Independence Day lawmnaa Chief Minister sawi danin, Covid-19 chu World Health Organisation-in March 11, 2020-ah khawvel pum dâp chhuak hripui (pandemic)-ah a puang a; Mizoram sorkar pawhin hma a la nghal a, state, district leh village/local-ah task force a din a, kawng hrang hranga thawk tur task group eng emaw zat din a ni bawk.

Mizoram chu India ram state zinga hripui vanga inkhàrkhip puang hmasa ber zinga mi a ni a, ram pum huapa puan a nih hmain Mizoram sorkarin a puang a; Lengpui Airport chu India rama airport zingah Covid-19 screening kalpui hmasa ber zinga mi a ni.

CM chuan, hripui donaa a hma­táwnga thawk te, sorkar hnathawk, task force hrang hrang, kohhran, tlawmngai pawl leh CM Relief Fund-a sum thawhtute chungah lawmthu a sawi. Zoramthanga chuan, June 21, 2020 aṭangin lirnghingin vawi tam tak Mizoram a sâwi tih sawiin, "Chenna in 283 leh thil hlu tam tak a chhia a, thil chhe hlut zawng hi cheng nuai 316.35 vela chhût a ni," a ti.

CM Zoramthanga chuan, Mizoram hmasawnna turin Socio-Economic Development Policy (SEDP) hlawhtling taka kalpui tum a nih thu sawiin, "Hei hian hmasawnna ki péng pawimawh tin háwl kimin, Mizoram chu state intodelh, a rama cheng mipuite khawsak changkang leh khawtlang nun nuam a siam dawn a ni," a ti. Chief Minister sawi danin, SEDP kalpuina turin kum 2019-20 chhungin cheng vbc. 750 dah a ni a, chuta ṭang chuan vbc. 561.62 chu department hrang hrangah sem a ni. SEDP hnuaiah Horticulture department-in Lengpui leh Hmunpui khuaah Model Bamboo Plantation an siam a, hamṭhatna dawngtu mi 209 an awm a, mau ṭiak 79,000 an phun tawh.

Covid-19 kaihhnawihah Mizoram police mi 3,000 vel hmun hrang hrangah an duty a; Ministry of Home Affairs-in state police thawk ṭha paruk a thlan zingah Mizoram police an tel a, chu vang chuan sorkar laipuiin Modernisation of Police atan Mizoram hnenah cheng vbc. 25.81 a rawn pêk phah a ni. Lammuala Independence Day (I-Day) lawmnaah hian parade a awm lo a, sorkar hnathawk zingah a hotu lian zual te, chanchinbu mite an tel a; guard of honour hun hmangtu 3rd bn. MAP, 46 Assam Rifles, 90 Bn BSF, Mizoram Home Guards leh 5th IR Bn-te leh 1st Bn. MAP Brass Band-te an tel bawk.