June 16-ah HSSLC exam

Mizoram Board of School Education (MBSE) chuan Higher Secondary School Leaving Certificate (HSSLC) Examination 2020 la zawh lohte leh High School Leaving Certificate (Com­partmental) Exami­na­tion, 2020-te chu June 16, 2020-ah ṭan tur a nih thu a puang.

HSSLC Examination 2020-ah exam zawh hman loh, inkhàrkhipin a nan tâk subject panga a la awm a; chu'ngte chu June 16-18 chhunga chhunzawm turin ruahman a ni. June 16-ah Economics/Chemistry (T), June 17-ah Sociology leh June 18-ah Computer Science (T)/Home Science (T)-te exam a ni dawn. Exam hun chhung chu chawhma dar 10 aṭanga chawhnu dar 1 a ni ang.

HSLC (Compart-mental) exam pawh June 16-ah neih tur a ni a, exam fee Rs. 250, late fee Rs. 500, centre fee Rs. 150 leh practical fee Rs. 100 a ni ang. June 5, 2020 thleng application form thehluh theih a ni.

Compartmental exam atana MBSE-in exam centre 11 a ruahmante chu - Mizo High School, Aizawl, Mamit H/S, St. John’s HSS, Kolasib, GM H/S, Champhai, Serchhip H/S, Lunglei H/S, Region H/S, Lawngtlai, Siaha H/S, Saitual H/S, Khawlzawl H/S leh Hnahthial H/S-te a ni.