MPF-in fimkhur turin an chah

Mizoram People Forum (MPF) Board of Executive Committee chu August 14, 2020 chaw­hnu khan Central YMA Committee Room-ah an ṭhu a, village council leh local council inthlan chungchang an sawiho. Covid-19 lèn lai a nih avangin, mi ina luta campaign chungchangah fimkhur turin candidate-te leh party mite an chah.

MPF meeting hi vice president Rev. K Lalrin­mawia'n a kaihruai a; August 27, 2020-a VC/LC inthlan turah MPF leh political party-te Thawhhona Thuthlung no 2.(2)-a 'Election puan a nih hnuah house to house campaign hi candidate-te tan phal a ni ang a, amaherawhchu, sum leh therhlo nena lèn ni lo se. Party worker-te'n candidate-te tel loa house to house campaign neih loh ni se' tih chu a ngai anga kalpui an rêl.

House to house cam­paign chungchang hian MPF chuan, Covid-19 lèn lai a nih avangin VC/LC huam chhunga MPF local forum, political party/candidate leh task force-te inráwnin, an huam chhung dinhmun hre chungin a ṭul anga an lo siam rem an remti a ni. Inthlan nía MPF Gen.Hqrs/district forum/constituency forum, etc. anga polling booth tlawh kual ṭhin chu tun ṭum VC/LC inthlanah chuan tih loh an rel a; "Local forum-te pawhin inthlan nía MPF duty inruatah, kum lama naupang deuhte inruat ni se," an ti.

MPF chuan, August 25, 2020 tlai dar 5 thleng campaign-na hun a awm tih sawiin, party leh candidate-te'n Model Code of Conduct an bawhchhiat lohna tur leh mawihnái taka an campaign theih nana a ṭul anga hma la turin local forum-te an ngen a; voter-te hming leh contact number ziah luh buaipui tur a nih avangin, vote thlak turte electoral roll-a serial number enpui leh a ṭul anga slip buaipuite chu local forum kutah a awm tih an tarlang.