KHAWTHLIR

Mizoram Maxicab Owners Association Sub-Headquerter, Serchhip district chuan Covid-19 darh zau zel avangin August 19, Nilaini aṭang­in Serchhip leh Aizawl inkara maxicab service-te an titawp rih dawn tih an puang. Maxicab tlan rih lo tura an tih hian hun bituk a awm lo a, an tlan dawn loh avangin mipui hriatthiam an dil a ni.

IPR minister Lalruatkima chuan August 15, Inrinni khan Champhai Bethel Venga MJA Press Club a tlawh a, Champhai district MJA member-te nen an inkâwm. Minister chuan, Covid-19 vangin hmasawnna leh mamawh angte a thawh chak theih loh tih sawiin, "A ṭul ang zela hmalak a ni. Sorkarin chanchinbumi­te a ngai pawimawh a, an hamṭhatna leh mamawhte a ngaihtuah zel ṭhin," a ti a; hripui donaah ṭha taka sorkar ṭawi­awm a, thuràwn pe ṭhin turin a sáwm.

Sateek Village Task Force hruaitute chuan, Covid-19 hripui léng vangin an khuaa Lian­phunga Búng chu tlawh theih a nih rih loh thu an tarlang a; tlawh tuma kal lui lo turin mi tin an ngen.

YMA, Kulikawn Branch chuan August 15, Inrinni khan an YMA Hall-ah an member, HSSLC leh HSLC pass thar mi 73-te lawmpuina hun an hmang a, an ṭhathnem avangin inkhawm vawi hnihah lawmpuina an hlàn. HSLC exam dawna Kulikawn YMA-in free tuition class a siama tlawmngaia zirlaite zirtirtu mi pasarih hnenah chawimawina an hlàn bawk.

State Referral Hospital-ah August 15, Inrinni khan Covid-19 vei panga dah luh an ni a, nimin khan mi paruk dah luh leh a ni. SRH-ah hian hripui vei mi 57 enkawl mek an ni a, ICU-ah mi pahnih, SICU-ah pathum leh Isolation Ward-ah mi 52 an awm. SRH-ZMC Bulletin tarlan danin, ICU-a awmte'n hma an sâwn a, ward-a awm zingah insawiselna nei an awm a, SICU-a awmte'n harsatna an nei lo. Hetih lai hian, mi pasarih chu an taksa a chak ṭhat avangin CCC, Tribal Art Centre-ah sawn an ni.