Myanmar-a indo tur thuthang vangin Khawmawi mipui Mizoramah tlânchhia
Myanmar sorkar sipaite leh People's Defence Force (PDF)-te inbeih an tum hnai tih thâwm a awm avangin kar hmasa tàwp lam aṭang khan ramri depa khua, Khawmawi mipuite chu Zokhawthar lamah an tlânchhia a, mahse, ráltlân ang tak chuan an awm lo thung.
Zokhawthar aṭanga Vanglaini thu dawn danin, tun hnaiah PDF lamin kum tawp beihpui thlâk kalpui an tum a, Ṭiau leh Rih-a Myanmar sipai camp-te beih an tum tih thâwm a awm avangin Khawmawi mipui chu November 9, 2023 (Ningani) zan aṭang khan Zokhawthar lamah an tlânchhe ṭan a ni.
Sahimna zawnga Zokhawthara lutte zinga tam tak chuan an chhungkhat laináte an bèl a, chhungkhat lainá nei lote chu bâwktê khawhin an inkhuar hlawm thung.
Zokhawthar aṭanga thu dawnna chuan, Khawmawi aṭanga Zokhawthara tlanchhiate chu Zokhawtharah an awm reng lêm lo a, tam tak chu chhun lamah Khawmawi lamah an haw phei a, zanah erawh chuan Zokhawthar lamah an riak ṭhin tih a sawi a, "Thâwm a awm chuan an rawn lut a, thâwm a rehin an lêt leh nghal mai a, ráltlân tia han sawi mai theih pawh an ni lo," a ti.
Myanmar sipaite leh PDF-te chu an la inkâp chiah loa an hriat thu sawiin, "Myanmar lamah hian tlai/zan dar 6 aṭangin curfew a ni a, tun hnai te khan zana motor tlân pakhat erawh chu an kâp chiam niin kan hria," a ti a; tun hnaiah tho Káwl phai lamah sipai an chêt nat deuh avanga Zokhawthara tlan lut chhungkaw 93 chu an awm zui zel rih tih a sawi bawk.