Muallungthu Polling Station-a Officer chawlh lailawktir a ni

November 7, 2023, Mizoram Assembly inthlanpuia Muallungthu Polling Station-a preciding officer Lalremmawia Colney chu November 11, 2023 khan a hna aṭangin chawlh lailawktir (suspend) a ni.

Agriculture deputy director Lalremmawia Colney chawlh lailâwktirna thupek hi Agriculture department secretary C Lalzahngoa chuan a tichhuak a; Aizawla awm reng tur leh hotu sang zawk aṭanga phalna la hmasa lo chuan Aizawl chhuahsan lo tura tih a ni.

Tarlan tawh ṭhin angin, November 7-a MLA inthlanpuiah khan Muallungthu PS-ah mipui vote thlak hmaa vote thlâk chhinna, mock poll-a vote tlate chu paih loin mipui vote thlak zuitir an ni a; hei vang hian November 10, 2023 khan vote thlak ṭhat a ni.