Mizoram inthlana expenditure observer a chêt dan dik lo vangin chawlhtir a ni

Mizoram Assembly inthlanpuia Lunglei South, West Tuipui leh Thorang biala expenditure observer Gaurav Awasthi (IRS) chu a khawsak dan ṭha lo avangin Election Commission of India (ECI) chuan expenditure observer aṭangin a chawlhtir.

Lunglei aṭanga thu dawn danin, Gaurav Awasthi hi sorkar sum hmangin a mimal thawmhnaw tur Rs 20,000 vel man a lei nia puh a nih bakah, candidate agent-te leh an thachhang dâwltute tham lo tak takin a ṭawngkhum ṭhina puh a ni.

Candidate agent-te chu hlauthâwng taka siamin, ṭawngkam vìn tak hlîra a biak bakah, thil holam deuh an tihsual hlekah ngaihdamna a nei lo a, election official a thawhpuite pawh tham lo tak takin a ṭawng khum fo nia thu dawn a ni.

Gaurav Awasthi khawsak dan hi ṭha ti loin a enkawl MLA bial pathum chhunga political party hrang hrangte chuan inthurualin, an lungawi loh thu Lunglei District Election Officer hnenah an thlen a; chumi kal zelah chuan ECI chuan Gaurav Awasthi chu expenditure observer a nihna a hlihsak ta a ni. A aiawhtu tur ECI-in a ruat leh ang.

Gaurav Awasthi hian a thawmhnaw leina atana sorkar sum a hmante chu ama pawisaa rulh leh vek a tum thu leh, a thawhpuite leh candidate agent-te chunga a khawsak dan avanga ngaihdam a dil thu district election thuneitute a hrilh a ni.