India ram tana nunna hlantu sipai Lalfamkima vui liam a ni

India leh Pakistan ramri bula Pakistan sipaite'n an kah hlum 148 Bn. Border Security Force (BSF) head constable Lalfamkima (50) h/o F Lalzarliani Durtlang North chu November 11, Inrinni chhun khan sipai chawimawina nen vui liam a ni.

Tarlan tawh angin, Lalfamkima hi November 7, Thawhlehni zana Jammu & Kashmir-a Samba district chhung, Ramgarh Sector-a Pakistan sipaite nen an inkahnaah kah fuh a ni a, damdawi-inah hruai ni mah se, a hliam tuar loin zanlai pelh 12:30 a.m. (Nilaini) velah a thi. A ruang hi November 10 khan an in thlenpui a ni a, zanah lumen a ni.

Lalfamkima hi Inrinni chawhma dar 11 khan an inah vui phawt a ni a, chumi hnuah Durtlanga BSF hmunah sipai chawimawina nen vui leh a ni. Vuinaah hian chief minister Zoramthanga bakah sorkar mi pawimawh dang eng emaw zat an tel.

CM Zoramthanga chuan social media-ah Lalfamkima sûnna thu a tarlang a, "Pakistan sipaite nen an inkahnaah nunna a chán tih thu ka lo hriatin a pawi ka ti tak zet a, a kalsan tak a nupui leh a fate, a chhungte zawng zawng Pathian thlamuanna leh awmpuina kan dilsak a ni. Pu Lalfamkima hi ram tana nun hlântu sipai huaisen, hnam tana martar tiin, zah tak chunga hriat reng a ni tawh ang," a ti.