Saza humhalh lai kâptu la man lo

Serchhip leh Keiṭum inkar, Bawngchawm leh Ralkiaua khâm rama khawsa ṭhin saza humhalh lai chu kah a ni a, a kaptu man chhuah a la ni lo a, Environment, Forest & Climate Change department leh police-in an chhui zui mek.

Thenzawl DFO Lalbiak-chama Chawngthu tarlan danin, saza hi November 10, 2023 chawhnu dar 1:30 vel khan khâm aṭangin NH-54 kawng laih mekah a tla thla a, kawnga hna thawk mekte'n lo chharin, EFCC an hriattir nghal a ni. EFCC Serchhip Range-a thawkte a hmunah an kal nghal a, mahse, saza chu a lo thi tawh a ni.

Saza ruang chu Serchhip AH&Vety Hospital-ah endik a ni a; endiktu Dr H Vanlalrawna’n a sawi danin, saza chuan a pumah silaia kahna hliam a nei a, a puma a hliam chu thihpui thama ngaih a ni lo thung.

Saza hian no a pai mek a, no a neih a hun ṭêp (last stage of pregnancy) tawh. Inthazo tawh lo a nih avangin miin silaia an kah avanga hlauthâwng a tlanchhia a, a no pài a hrám tawh nen, khâmah hian a che sual ta nia rin a ni. Saza thi endikna result kimchang chu vawiinah tihchhuah a ni ang.

Thenzawl Forest Division-a hotute chuan saza chunga kutthlaktute hriat chhuah tumin theihtawp an chhuah a, Serchhip Police Station-ah FIR an thehlut. FIR thehluh a nih angin police pawhin an chhui zui mek a ni.

Thenzawl DFO chuan Bawngchawm leh Ralkiaua khâma saza langsar taka hmuh a nih fo avang leh, mi kutpalh a tawrh an hlauh avangin khawih lo tur leh tina lo tura ngenna October 31, 2023 khan a lo chhuah tawh a ni.