Legal services provider thawk ṭhate hnenah lawmman hlan

Mizoram State Legal Services Authority (MSLSA) leh High Court Legal Services Committee-in November 9, 2023-a Gauhati High Court Aizawl Bench conference hall-ah Legal Services Day an hmannaah legal services provider thawk ṭhate hnenah lawmman hlan a ni.

Legal Services Day hmanna hi MSLSA member secretary Gracy L Bawitlung-in a kaihruai a; MSLSA executive chairman Justice Michael Zothankhuma, Gauhati High Court judge chuan, legal services authority din chhoh dan leh mipui tana hna a thawh dan a sawi.

Justice Michael Zothankhuma chuan, Mizoram chu ruihhlo tawlhna kalkawng a nih avangin ruihhlo donaah ṭan tlàn a ngaih thu leh court leh mipuiin thawhhona ṭha an neih a ṭul thu a sawi a; environment humhalh turin mipui nen ṭanho a pawimawh thu a sawi bawk.

Gauhati High Court Legal Services Committee chairman Justice Nelson Sailo chuan, Lokadalat an kalpui dan leh a thlawna ukil rawihsak chungchang a sawi a; Gauhati High Court judge dang Justice Marli Vankung pawhin thu a sawi.

Inkhawmah hian legal services provider thawk ṭhate hnenah lawmpuina hlan a ni a; Legal Services Day pualin Millennium Centre leh a chhehvelah dan chungchang inziahna lehkhabu sem a ni bawk.

Legal Services Day hi district hrang hranga district legal services authority-te pawhin jail-ah leh hmun hrang hrangah an hmang a, mipuite hnena dan leh hrai zirtirna hun atan an hmang a ni.

LEGAL SERVICES DAY-A LAWMMAN DAWNGTUTE

Best Community Para Legal Volunteer - HL Biakmawia, Rengdil, Mamit district

Best Student Para Legal Volunteer - David Malsawmtluanga, Mizoram Law College

Best Panel Lawyer in Magistrate Triable Cases - H Vanlallawmzuala, Aizawl

Best Panel Lawyer in Sessions Triable Cases - K Laldinliana, Aizawl