KHAWTHLIR

KTP-in thisen pe

KṬP, Phulpui Branch chuan November 11, Inrinni khan an kohhran hall-ah ZMC tan thisen unit 48 an pe a, petute mipa 38 leh hmeichhia 10 an ni. KṬP, Chawnpui Branch pawhin an kohhran hall-ah Synod Hospital tan unit 31 an pe a, petute mipa 24 leh hmeichhia pasarih an ni.

Léngkìrah tla hlum

November 11, Inrinni chawhma dar 11 vel khan Zonunsanga (15) s/o Lalramliana, Theiriat, Lunglei chu a ṭhiante nena an ramkalnaah léngkìrah a tla a, damdawi-in panpui a nih hnuah a hliam tuar loin tlai dar 4:35-ah a thi. Zonunsanga hi nimin chhun dar 12 khan vui a ni.

UPC NEI zirlaibu

UPC North East India hnuaia General Sunday School department buatsaih kum 2024-a Puitling Sunday School zirlaibu 'Thuhriltu leh Hla Thlan Khawmte' tih leh naupang zirlaibu hrang hrang chu tun hnai khan UPC general superintendent Rev. R Lalrinsanga'n UPC NEI Office, Mualpuiah a tlangzarh. Puitling zirlaibu hi district hrang hrang leh Millennium Center-a Pentecostal Book Store-ahte zawrh a ni a, bu khat Rs 120 man a ni.

Police bo la hmu lo

November 5, 2023 aṭanga Mizorama chin hriat loa bo Assam police constable Sabin Nath chu nimin tlai thleng khan hmuh a la ni lo a, zawn mek zel a ni. Thu dawn danin, Sabin Nath hi Mizoram Assembly inthlanpuia duty tura rawn kal zinga mi niin, Ngopaa duty a ni a, inthlan hma November 5, 2023 aṭangin a awmna chin hriat a ni lo. Ngopa khuaa YMA branch hrang hrangte chuan a inchhâwkin a zawng a, Mizoram police pawhin an ui fing nen an zawng bawk. Sabin Nath awmna Assam Police 68th Battalion hotute pawh Ngopa-ah an kal tawh a ni.

Lusûn khawhar

Lai Autonomous District Council-a executive secretary H Lalruatkima (58) h/o Zahmingliani, Lawngtlai chu November 10, 2023 tlai khan Apollo Hospital, Kolkata-ah cancer vangin a thi a, nimin khan Lawngtlai Electric Vengah vui a ni.