Electric ban leh hrui chhia a tam

Thawhlehni zan leh nimin zinga thli tlehin Mizoram hmun hrang hrangah electric ban leh hrui a tichhia a, hei vang hian nimin khan Aizawl leh khaw dang eng emaw zata mite'n kawlphetha an hmu lo. Electric line chhiate hi nimin khan Power & Electric department-a thawkte'n ngawrh takin an siam.

P&E department hotute hnen aṭanga thu dawn danin, hmun eng emaw zatah thli tleh vangin electric ban a chhia a, thing tlu leh thing zar tliakin ban leh hrui a tihchhiat pawh eng emaw zat a awm. Electric ban leh hrui chhiate chu P&E department-a thawkte'n nimin khan a theih ang angin siamṭhat hna an thawk a, eng emaw zat chu an siamṭha hman. La siamṭhat hman lohte pawh line dang aṭanga kawlphetha pek dan tur ngaihtuah a ni.

P&E hotute chuan, April 18, 2020 tlaia thli tlehin Tuiriala bawlhhlawh paihna (dumping ground) bula Zuangtui to Saitual 132KV line ban (tower) pahnih a chhem tluk chu thla khat hnuah siam zawh a ni tih an sawi a; vawiin hian line siamrem nan leh Zuangtuia 132 kV sub-station-a transformer thlâk a nih dawn avangin vawiin chawhma dar 9:30 aṭanga chawhnu dar 2:30 inkarah Serchhip & Saitual feeder 132kV line-ah kawlphetha pek a ni dawn lo tih an sawi.

Line siam rem leh transformer thlak a nih dawn avang hian vawiinah Saitual, Champhai, Khawzawl, Serchhip, Hnahthial, Lunglei, Lawngtlai leh Siaha district-te leh Darlawn tlángdungte'n kawlphetha an hmu dawn lo. P&E department chuan mipui hriatthiamna an ngen a ni.