PDF leh sipai inbeihnaa hliamte Mizoram damdawi-inah lâk an ni : Zokhawtharah mi 1 thi, mi 2 hliam

People's Defence Force (PDF) sipaite'n November 12, Pathianni zan aṭang khan Rihkhawdar leh Ṭiau (Khawmawi) vela Myanmar sipai hmun (camp) an bei a, nasa takin an inkâp zui. He inbeihna avang hian PDF sipai 18 chu Mizoram lama damdawi-inah lâk an ni a, Zokhawthara awm mek civil mi pakhat a thih bakah mi dang pahnih an hliam.

Zokhawthar YMA hruaitute hnen aṭanga thu dawn danin, PDF sipaite hian Myanmar sipai hmunte chu lâk tumin an bei a, nasa takin an inkâp zui a; nimin lamah pawh la inbei zui zelin, tlai lam thlengin an inkâp a, Rih leh Khawmawiahte helicopter hmangin bomb eng emaw zat thlâk a ni.

PDF-te hian nimin lam khan Rihkhawdara Myanmar sipai camp chu lain, an hâl a; Khawmawi bul hnaia sipai camp pawh nimin tlai lam khan hâl a nih avangin PDF-te'n an la tawh nia an hriat thu an sawi.

Myanmar sipai leh PDF inbeihnaah hian silaimuin Zokhawthar, Mizoram lam a fuh ṭhin bakah, bomb an thlakin a per thleng ṭhin a; nimin zing lam khan Zokhawthara ráltlâna awm mek Chungthianmawia (51) chu a vawk chaw pe tur silaia kah fuh niin, a thi a, nimin vêk khan Zokhawthar YMA Hall-ah vui a ni.

Zokhawthara ráltlân awm mek dang Sawikimi (67) leh Lalthasuah (12)-te pawh an hliam a, Champhai District Hospital-ah enkawl mek an ni. Inbeihna avang hian India khua leh tui hliam an awm hriat a ni rih lo.

Inbeihnaah hian Myanmar sipai zingah thi leh hliam eng emaw zat an awm a, PDF lamah pawh eng emaw zat an hliam a, hliam zinga mi 20 chu Champhai District Hospital-ah lak an ni. Hliam na zual mi pariat chu Aizawl lama enkawl turin buaipui a ni a, nimin tlai dar 4 thleng khan mi panga chu ambulance hmanga Aizawl panpui tawh niin, mi dang pathum pawh Aizawla thawn turin buaipui mek a ni bawk.

Hliamte hi an thisen a chhuah nasat avangin thisen pek an ngai hlawm a; YMA Sub-Headquarters, Champhai chuan thisen pe turin Champhaia YMA branch pathum - Vengsang, Vengthlang leh Zotlang branch-te an ngen. Zotlang branch aṭangin mi 26, Vengsang branch aṭangin mi 14, Venglai aṭangin mi pali, Vengthar aṭangin mi pahnih bakah, Melbuk, Murlen leh Dungtlang mi pakhat ṭheuhin thisen an pe a, thisen pek zawng zawng hi unit 49 a ni.

PDF-te'n Myanmar sipai camp beih an tum tih thâwm a awm avangin Khawmawi leh a chhehvela mi ṭhenkhat chu November 10, 2023 zan aṭang khan Zokhawtharah an lut a, chhun lamah erawh chuan an khaw lamah an lêt leh ṭhin.

November 12, Pathianni zana inbeihna tak tak a awm hnuah mi tam tak Zokhawtharah an lut a, nimin lamah chuan khaw mipui zawng zawng an lut tawh nia an hriat thu Zokhawthar YMA hruaitute chuan an sawi. Raltlante chu Zokhawthar khawtlangin a theih ang angin an lo tuamhlâwm a ni.