AAP zirlai pawlin scho' an bawhzui

Aam Admi Party (AAP) zirlai pawl, Chhatra Yuva Sangharsh Samiti (CYSS) chuan nimin khan zirlaite'n tribal scholarship an dawn theih loh chungchangah chief secretary Dr Renu Sharma, Higher & Technical Education secretary Esther Lalruatkimi leh Mizoram Scholarship Board secretary PL Ramliana te an hmu.

CYSS chuan, nimin khan Chief Secretary hoin sorkar hotute an ṭhukhawm a, Screening Committee-in scholarship chungchangah approval an pek thu an tarlang a, "MSB secretary Pu PL Ramliana'n, 'MSB lam chuan engkim kan peih thlap tawh a, approval hi Election Commission of India hnuaiah a lut leh ang a, vawiinah tihfel hman a nih chuan zanin emaw, naktuk velah keini lam chuan kan sem chhuak nghal dawn,' a ti a, a lawmawm kan ti hle," an ti.

AAP zirlai pawl tarlan danin, scholarship sum second instalment Rs 18,75,00,000 chu September 25, 2023 khan sorkar laipui aṭangin Mizoram sorkarin a dawng tawh a, inkaihhruainaah chuan sum chu dawn aṭanga ni 30 ral hma ngeia pek chhuah tur a ni.