MLA Inthlan neih zawh taka media-te hmalakna thlirlet

Additional chief electoral officer H Lianzela, Media Cell nodal officer kaihhruaiin nimin khan CEO pisaa Media Centre-ah MLA inthlanpui neih zawh taka media cell hmalaknate thlirlet a ni a; inthlan kaihhnawiha chanchinbute inelna hrang hrang an endik nghal.

H Lianzela chuan, inthlannaah media tel loa chêt lak a harsat thu leh inthlan puan aṭanga media mite ṭawiawmna fakawm a tih thu a sawi a, "Inthlan chungchanga hriat tur pawimawh tak takte mipui hnena an puang chhuak ṭhin hian awmze thui tak a nei a, media-te nena felfai zawka thawhho a nih theih nan CEO pisa leh district khawpuiah Election Commission of India kaihhruaina siam angin media cell din niin, thawhhona leh ṭanrualna ṭha tak hnuaiah hmalak a ni," a ti.

District Media Cell-te bakah MCMC member-te ṭawiawmna fakawm a tih thu sawiin H Lianzela chuan, media cell member-te leh hmunhma hman hawh tirtu ICT department chungah lawmthu a sawi a, "Inthlan kaihhnawih hmalaknate zawhfel a la nih loh avangin thawhhona ṭha tak chhawmnun zel a ṭul hle a ni," a ti a, hmalaknate ziak leh thlalaka dah zel a nih theih nan documentation lam ngai pawimawh turin member-te a chah nghal.

Ṭhutkhawmah October 26, 2023 aṭanga November 6, 2023 chhunga inthlan chungchang mipui zirtir kawnga chanchinbute inelna endik a ni. Chanchinbu pariatin mipui zirtir kawnga hma an lakna CEO pisaa an thehluhte chu tehfung hrang hrang hmanga endik niin, endikna result hi November 15, naktukah puan tum a ni. Lawmman inhlan hun tur erawh inhrilhhriat leh tur a ni ang.

Election media cell chuan inelna huanga tela mipui zirtir kawnga theihtawp chhuahtu chanchinbute fakawm an tih thu an sawi a; inthlanna dik, felfai leh langtlang neih a nih theih nana an hmalaknate ropui an tih thu an tarlang bawk.