Scho' pek phûtin lungawi lohna lantir dawn

Zirlaite hnenah tribal scholarship second instalment pek a la nih loh avangin MZP chuan vawiin hian Mizoram Scholarship Board (MSB) pisa kawtah lungawi lohna lantir (sit-in demonstration) an tum.

MZP chuan nimin khan tribal scholarship second instalment la pek loh chungchang an ngaihuah a; Mizoram sorkarah vawi tam tak an thlen tawh a, scholarship file pawh an ûm zui ṭhin tih tarlangin, "Tun thlenga zirlaite'n an chanvo an dawn tur scholarship an la dawn loh avangin November 14, Thawhlehni zing dar 9 hian MSB office kawtah sit-in demonstration neih kan rél a ni," an ti.

MZP chuan, sit-in demonstration-in awmzia a la neih loh chuan a tawp thlenga hmalak zel an tum thu an tarlang bawk.

MZP tarlan danin, tribal scholarship second instalment pawisa chu Mizoram sorkar kutah a luhna a rei tawh a, Mizoram sorkar kuta tuna táng zat chu cheng nuai 1,787.48 a ni.

Scholarship second instalment pawisa la dawng lo zirlai 19,495 an awm a, chu'ngte chu Mizorama zirna-in 36-a zirlai 5,023 te, pawl 11 leh 12 zirlai 11,462-te leh Mizoram páwna awm zirlai 3,010 an ni.