Nungcha chi thar hmu chhuak
Mizoram University-a Department of Zoology team, Prof. HT Lalremsanga leh a hote chuan Ramdaidêp chi thar, Cyrtodactylus (Bent-toed Gecko) an hmu chhuak a, a hmingah a chênna hmun leh khua, Vairengte hming chawiin Cyrtodactylus Vairengtensis tih an phuah.
Nungcha hmuhchhuah thar chungchang hi November 13, 2023 khan international scientific megajournal Zootaxa-ah tarlan a ni.
Tarlan danin, Cyrtodactylus-te hi khawvel pum huapah species 354 leh India hmarchhakah species 21 hmuh chhuah a ni tawh a; mihring chenna bul, dái, rampalaileng leh ramhnuaia hmun biru lai, lei kua, lung kar, thing kawrawng leh hnim zingahte an khawsa ṭhin.
Zan thim hnuaia chaw zawnga vâk chhuak chi (nocturnal) an nih avangin nungcha hmuh zen zen tur awm lo chi a ni.
Tun hnaiah ngun zawka zawn leh zir chian a nih aṭangin species thar hmuh chhuah belh zel a ni a, an biology pawh hriat tur a la tlem hle.
Cyrtodactylus Vairengtensis hi a pianhmang leh DNA an zirchianna aṭangin kum 2021-a Mizoram aṭanga species thar lo hmuh chhuah tawh Cyrtodactylus Aaronbraueri nen an inhnaih bera hriat a ni.