Muallungthu Polling Station-a PO lakah FIR thehluh a ni

Mizoram Election department chuan Aizawl South-III huam chhung Muallungthu Polling Station-a presiding officer (PO) Lalremmawia Colney lakah police hnenah FIR an thehlut.

Vanglaini thu dawn danin, Election Commission of India thu angin, Election department hian Lalremmawia Colney lakah hian FIR an thehlut a; police-te chuan FIR chu bawhzuiin, a ṭul angin hma an la nghal.

Lalremmawia Colney hi vote thlâk chhinna (mock poll)-a vote tlate lak chhuah a nih loh avangin polling station-a vote awm zat aia tam vote tla thup tumah leh polling station-a vote awm zat ziah belhah puh a ni.

Tarlan tawh angin, Lalremmawia Colney hi Agriculture deputy director a ni a, a hna aṭanga suspend a ni tawh. Mock poll-a vote tlate la chhuak loa vote thlak a nih avang hian Muallungthu PS-ah hian November 10, 2023 khan vote thlak ṭhat a ni.