Vote chhiar hunah chak thei kan ni a, chak lo thei kan ni bawk - Tawnluia

MNF senior vice president Tawnluia chuan, Mizoram inthlanpuiah chak thei an ni ang bawkin chak lo thei an ni tih a sawi a, eng pawh hmachhawn thiam tur leh puitling taka awm turin an party mite a chah.

Tawnluia hian nimina Mizo Hnam Rûna inkhawmah thu sawiin, "Kan hmabak vote chhiar hunah chak thei kan ni a, chak lo thei kan ni bawk. Khawvela kan awm chhungin dam lohna leh harsatnate a awm ṭhin. Hlimna leh lawm cháng a awm bawk angin, eng pawh hmachhawn thiam turin i inbuatsaih ang u. Chu chu mi puitling tih dan a ni. Hnehna kan chang a nih pawhin chapona leh mi dangte deuna a awm thei. Puitling takin i awm ang u," a ti.

Tu pawh sorkar se, an thil tih leh an hnathawhah teh ṭhin ni se a duh thu sawiin Tawnluia chuan, "Sorkar kal tawhte'n eng mah ti lo ang maia an sawi ṭhin hi a ṭha lo. Political party-te'n manifesto kan duante hi inteh nan hmang ila a duhawm hle ang," a ti. Vote chhiar hun chungchangah, party leh sorkar angin an duh lo hle a, hma an la zel tih a sawi.

MNF Senior Vice President chuan, mipui aṭangin sorkar lai ninna lian a awm lo nia sawiin, "Tuna ministry-ah mipuiah anti-incumbency (sorkar lai thlâk duhna) lian tak a awm lo hi a lawmawm hle. Mizo nationalism keng nungtute hi mipuite'n kan kutah sorkarna an dah leh ngei dawn a ni," a ti.

MNF hruaitute chungchang sawiin tawnluia chuan, "Pu Laldenga awm loh hnuah Pu Zoramthanga'n min hruai a. Kan president hi Pathian ṭih mi leh ṭawngṭai mi a ni a, mahni inthunun thei, mi taima leh huaisen a ni. hmachhawp nei mi, 'A man of vision' a ni a, hma lam hun kum 10/20 thlirin min kaihruai ṭhin," a ti a; MNF sorkar chhungin Bru raltlante vanga buaina chinfel a nih thu te, ramri chungchangah huaisen taka an kal thu te, Assam Rifles sawn chu thil khirh tak a nih thute a sawi.

Tawnluia chuan, tluang taka MLA inthlan neih a nih theihna tura Election hotute leh sorkar official te, political party te, print media leh electronic TV te, MPF-te chungah a lawm thu a sawi a; vote 80% chuang a tla chu lawmawm a tih thu leh, Tuichang bialah a elpui lamah sum leh pai chelek mah se, a tlin a inbeisei thu a sawi bawk.

MNF inkhawmah hian an candidate dang - Dr ZR Thiamsanga, K Vanlalvena, R Lalzirliana, K Lalsawmvela, Lalmalsawma Zasai leh J Malsawmzuala Vanchhawng te pawhin chak ngei tura an inrin thu an sawi tih MNF thuchhuah chuan a tarlang.