Sorkarna kan siam chuan Pathian leh neutral-te vang a ni ang - Lalduhoma

ZPM leader Lalduhoma chuan nimin khan ZPM pisaa inkhawmah thu sawiin, Mizoram inthlan boruak thlirin, ZPM-in sorkarna siam ngei an inbeisei a, sorkarna an siam a nih chuan Pathian leh ram mipui, neutral-te vang a nih tur thu a sawi.

Lalduhoma chuan, "Inthlan boruak thlirin sorkarna siam ngei kan inbeisei. Kan result neih tur hi kan ṭawngṭai chhànnaah kan ngai dawn. ZPM hian chung lamah thawhpuitu kan nei a, hnehna kan chang a nih chuan ZPM party vang ni loin, Pathian vang leh neutral mipui vang a ni ang. Party sorkar ni lo, mipui sorkar din kan tumnaa min ṭawngṭaisaktute leh kawng hrang hranga theihtawp chhuahtu zawng zawng chungah lawmthu kan sawi," a ti.

Sorkar ṭha zawk nei turin mipui an tuihâl tih a lan thu sawiin Duhoma chuan, "Kum naupang deuh, vote nei thar leh upa zawk thlengin vote thlâk turin phûr takin kan pên chhuak tlang a, vote pawh a tla ṭha hle," a ti a, neutral vote tla ṭha chu ram tidamtu leh siamṭhatu a nih dawn thu a sawi.

Lalduhoma chuan, inthlan zawh tâkah MPF awm leh awm lohna a dang hle nia sawiin, "Hmun ṭhenkhatah MPF ngaih theih lohna a awm niin a lang. Inthlanna thianghlim leh felfai Mizoramin a neih theihna tura theihtawp chhuahtu, a neitu pawh kohhran leh NGO zawng zawng bakah political party zawng zawngte kan nih avangin páwl hrang daih anga ngaih tur an ni lo a, a neitu vek kan ni," a ti.

Inkhawmah hian ZPM secretary general PC Vanlalruata pawhin thu sawiin, "ZPM hi party ṭhangduang leh mipuite'n sorkar tura an rin kan ni a, Pathian zarah sorkarna kan chang a nih chuan Sustainable Development & Reform Policy (SDRP) ruahmanna kan neih hi ṭha takin kan kalpui nghal dawn a, kan intiam ang ngeiin eirûkna kan do ang. Eirûkna lakah kan fihlim dawn," a ti a; eirukna an dona turah theihtawp chhuahpui turin mipui a sawm a ni.