Gender budgeting chungchang zirho

Social Welfare, Tribal Affairs, Women & Child Development (SWTAWCD) department hnuaia Directorate of Women & Child Development chuan nimin khan Aijal Club-ah 'Training of Trainers on Gender Budgeting for Government Officials' an buatsaih a, SWTAWCD secretary KT Beicho-a'n a hmanpui.

KT Beicho chuan, kal khawmte chu gender budgeting chungchang mi dangte zirtirna pe chhawng theitu ni tura theihtawp chhuah turin a fuih a, "Hmeichhia leh mipate intluktlàn theih lohna awmte hnawh khah a nih a, a inchen lote inchentir a nih theih nan gender budgeting hi a ṭangkai hle," a ti a; Sustainable Development Goals (SDG) 17 zinga pangana chu intluktlanna chungchang a nih thu leh SDG-in a hmachhawpte zingah kum 2030-ah chuan hnufual bik awm loa intluktlanna neih theihna tura hmalakna a nih thu a sawi.

SWTAWCD Secretary chuan, gender budgeting atana hma la tur nodal department chu Women & Child Development a ni a, Mizoram pum tana gender budgeting nodal officer turin Women & Child Development director pawh sorkar pawmpuinain ruat a nih tawh thu a sawi bawk.

Training-ah hian UN-WOMEN hnuaia Gender Responsive Budgeting programme lead Dr Sanghamitra Dhar-in thil pawi­mawhte a zirtir a ni.