Ngopa EMRS hmasawnna tur sawiho

Saitual district level committee on Eklavya Model Residential School (EMRS) chu nimin khan an chairman Dr Lalngura Tlau, bawrhsap kaihhruaiin DC conference room-ah an ṭhukhawm a, thawktu lak belh leh sikul hmunhma tihhmasawn chungchang an sawiho.

Dr Lalngura Tlau chuan, EMRS-a thawktu lak belh turah a thiam leh tling ngei lak a duh thu a sawi a, "Indaih lohna vanga thawktu lak belhnaah a thiam leh tling ngei lak ni se, chutiang mi tur pawh zawn theih hram a nih ka beisei. EMRS chauh ni lo, Mizoram hmun dangah pawh tling tâwk lo chunga thawktu lak a awm ṭhin hi zirnain a tawrh phah hle a ni," a ti.

Ṭhutkhawmah hian, Ngopa EMRS-a thawktu 4th grade pakhat leh Mizo zirtirtu pakhat lak belh chungchang leh sikul hmunhma tihhmasawnna turte an sawiho a ni.

Ngopa EMRS hi kum 2021-ah bul ṭan niin, pawl 6-10 inkar chu CBSE syllabus anga zirna kalpui a ni a, CBSE exam centre a ni nghal. Principal hoin zirtirtu 12, thawktu dang 10 leh zirlai 270 an awm mek a; nurse pakhat leh damlo pahnih mut theihna health centre an nei bawk.