KHAWTHLIR

Vote chhiar hunah thu dawn la nei lo

Mizoram Election department chuan Mizoram inthlana vote tlate chhiar hun sawn leh sawn loh chungchangah Election Commission of India (ECI) aṭangin thu dawn an la nei lo. November 7, 2023-a MLA inthlana vote tlate chhiar hun tura ruat December 3, 2023 chu Pathianni a nih avangin sawn turin Mizorama kohhran, tlawmngai pawl leh political party-te'n an ngen a, tun thlengin ECI chuan thu leh hla a la nei lo a ni. December 3 a vote chhiar turin inbuatsaihna an kalpui zel.

Inthlan thlir lêt

Kolasib district election officer John LT Sanga, bawrhsap hoin nimin khan DC conference hall-ah Kolasib district-a assembly constituency pathuma returning officer te, assistant returning officer-te leh election officer-te'n MLA inthlanpui neih zawh tâk an thlir let a; vote chhiar huna inbuatsaih dan tur an sawiho nghal bawk.

Chhanchhuah hna thawh dan inzirtir

Disaster Management and Rehabilitation department leh 5th IR chuan nimin khan 5th IR Headquarters, Lungverhah chhiatrupna a thlen thulha chhanchhuahna hna thawh dan tur zirna an buatsaih a, DMR secretary K Lalrinzuali'n a hmanpui. Training hi kar hnih chhung awh tur a ni a, 5th IR sipai 32 an tel. DMR, Aizawl District Quick Response Team leh National Disaster Response Force-a mithiamte'n thil pawimawhte an zirtir dawn a ni.

Enchhin leh dawn

Nimin khan Bazar Bungkawn leh Bawngkawnah traffic signal light hman chhin a ni a, ruahman dan chuan chawhma dar 11 aṭanga tlai dar 3 thleng hman tur a ni. Mah se, Bawngkawnah chuan a setting-ah fel tâwk lo a awm avangin chhun dar 1 vel thleng enchhin niin, Bazar Bungkawnah chuan chawhnu dar 1:45 thleng enchhin a ni thung. Ruahman dan chuan vawiinah traffic signal light hi chawhma dar 11 aṭanga tlai dar 3 thleng enchhin leh tur a ni. Traffic signal light hman inzirtirna video clip leh thlalakte Aizawl Traffic Facebook group, Aizawl Traffic Police-ah en theih a ni.