Khiangte Construction Ṭhazual : GOSPEL Chart hmahruaitu Amosa Vocal Point

Khiangte Construction Ṭhazual Gospel chart tharah Champhai band, Amosa Vocal Point chu hmahruaitu an rawn ni ta.

Amosa Vocal Point-te zai thiam leh zai ngaihnawmzia te inhrilh nawn a ngai lo a, no. 1 an rawn hauh pawh hi thil mak a ni hran lo. An hla tinte nung takin, ngaithlatute thinlung hneh takin an rawn sa zel thei a, chart-ah pawh an hla hrang hrangte an lanpui thei zel a ni.

Kum 2018-a Champhai Vengthlang Branch KṬP-in branch programme a siamah, group OB-te male voice atan a ruat a, heta ṭang hian Group pakhata OB-te chuan he band, Amosa Vocal Point hi an din chho ta a ni. Tunah hian member panga awmin, original member hi pathum an la tel. Member-te hi Champhai Vengthlang leh Venglaia mite niin, member-te chu - VL Ramdina, TC Vanlalchaka, R. Vanlalnghaka, Malsawmdawngkima leh Lalmawipuia te an ni.

Chart-a pakhatna an nihpui, 'Khawnge i awm' tih hi kumin October 1-a an tihchhuah niin, he hla hi Marvin Lalhrilliana phuah a ni. Recording hi Music Plus, Champhai Venglaiah tiin, video hi Khalthang Arts kutchhuak a ni thung.

Angaihtei Hnialum pawhin hma a sawn zel a, 'Thiam Channa Kraws' chu pahnihnaah a rawn chho. Cindy Lalthanpuii'n a hla thar, 'Ka famkim lohna ti famkimtu' chu pathumnaah rawn lanpuiin, C. Lalremruata 'Ka Chakna Lalpa' leh Arella 'Ropui ber' tih chu Top 5-ah an lang bawk.