Phai aṭanga damlo rawn hawte enkawl dan tur sawiho

Nimin khan Health minister Dr R Lalthangliana hoin Health department hotute, doctor rualte leh Non-Governmental Hospital Association of Mizoram (NGHAM) aiawhte an ṭhukhawma, phai aṭanga damlo lo hawte enkawl dan tur an sawiho.

Health Minister chuan sorkarin ram pawn aṭanga lo haw natna khirh zual vei mek damdawi-ina awm (admit) mamawhte awmna tur hospital leh anmahni enkawl zui zel dan tur kaihhruaina rang taka a tihchhuah tur thu a sawi.

Dr R Lalthangliana chuan tun dinhmunah Covid-19 lakah Mizoram kan la him nia a lan thu sawiin, "Chutihrualin hmun danga Mizoram mi leh sa awm mekte state chhungah eng emaw zat an lo luh tak avang leh an lo luh zel dawn avangin theihtawp chhuaha ṭanrual a ngai," a ti.

Health department-a thawktute thawhrimzia a hriatpui thu sawiin Health Minister chuan,"An thawhrimna rah hi Pathianin mal a sawm,"  a ti a, kan him nia kan lan lai hian zan hnih khat thil thuah Covid-19 positive nei thei reng kan ni tih kan hriat a ṭul thu a sawi.

Covid-19 Medical Operational Team chairman Dr ZR Thiamsanga pawhin thu sawiin, "Pawn lam aṭanga lo haw mek zingah natna khirh tak, a bik takin cancer natna vei, sorkar quarantine hmun emaw, mahni ina quarantine emaw rem lo, hospital-a admit ngei ngei ngaite dinhmun hi ngaih pawimawh a ngai a ni," a ti.

Meeting-ah hian Zoram Medical College tan ambulance ngaihtuah a nih thu leh Aizawl Civil Hospital-a khum 10 awmna tur ICU siam tura ruahmanna awmte sawilan a ni.