MNF sorkarin SEDP-ah Rs. 3,00,000 sem a tum tak tak lo - Congress party

Mizoram Pradesh Cong­ress Committee (MPCC) Media depart­ment hruaitute chuan In­rinni khan Aizawl Press Club-ah thuthar theh­darhtute an kâwm a; MNF sorkar chu SEDP hmanga Rs. 3,00,000 sem tumna tak tak nei loah an puh.

MPCC Media sec­retary C Lalhriatpuia chuan, VC leh LC inthlan tur avangin MNF hruai­tute'n Rs. 3,00,000 sem an sawi uar thar leh tih sawiin, "Hmun hrang hrangah mi thlêmna atan an hmang mek. Inthlan awm loh laia sawi ngai si lo, inthlan dawn veleha cheng nuai 3 sem rawn sawi chhuah leh hi mipui bum tumna, mipui rilru hruai kâwi tumna dik tak a ni," a ti.

Kum 2018 MLA inthlan dawna MNF president Zoramthanga sawi uar ber chu Rs. 3,00,000 sem tur thu a ni tih sawiin C Lalhriatpuia chuan, "NLUP dawng tawhte pawhin an dawn tur thu chiang takin a sawi. Sorkarna an siam hnuah erawh a thusawi dan a thlak daih a, project base, a semin kan sem dawn lo, a ti daih a ni," a ti a; inthlan hma leh hnua MNF President thusawi a danglam thu a sawi.

C Lalhriatpuia chuan, sorkarin SEDP atan kum 2019-20 ah cheng vbc. 750 leh 2020-21 ah vbc. 513 a dah thu sawiin, "Heta ṭang hian an intiam angin Rs. 3,00,000 sem se, chhungkaw 42,100-in SEDP nuai thum hi an dawng dawn tihna a ni. Mahse, SEDP cheng nuai thum dawng sawi tur an la awm lo," a ti.

MPCC Media hotute chuan, August 4, 2020-a Horticulture department-in dragon fruit chíngtu mi 95 hnena ṭanpuina an pek chu anthurium chingtute tana ruahman zawk a nih thu an sawi a, "Lockdown vanga anthurium hmanga sumdawnna kalpui a harsat avangin dragon fruit chíngtute pek an ni," tiin, dragon fruit chíngtute pawh Rs. 3,00,000 pek an nih loh thu an sawi.

Chhungkaw tam takin SEDP aṭanga cheng nuai thum dawn an inbeiseina a thámral mek nia sawiin MPCC Media hotute chuan, "Inthlan dawna mipui bumna atana MNF auhla mai a ni tih a chiang chho zel. Cheng nuai thum an sem theih loh lai hian, Aizawlah PAHOSS aṭangin nuai tam tak an sem mek thung," an ti.