KHAWTHLIR

Bairabi leh Sairang inkara rél kawng siam mekah, rél kawngin a paltlang vanga ram tihchhiat neitu mi 1,800-in zangnadawmna an dawng tawh.Kolasib DC office chhinchhiah danin, North East Frontier Railways hnuaia rél kawng siam mekah hian Bairabi leh Mualkhang inkar bikah ram neitu zinga mi 1,800-in zangnadawmna an la tawh a, chu'ng mite hnena pawisa pek chhuah belhkhawm chu Rs. 35,44,71,471 a ni.

Serchhip Hmarveng Branch KṬP chuan nimin khan Serchhip District Hospital tan thisen unit 25 an pe a, petute mipa 19 leh hmeichhia paruk an ni. AVBD leh NSS state office ruahman angin sikul pathuma NSS volunteer-te pawhin Aizawl Civil Hospital-ah thisen unit 22 an pe a, petute mipa 19 leh hmeichhia pathum an ni a; Helen Lowry HSS 

aṭangin mi 10, Mamawii HSS aṭangin mi pariat leh Modern HSS aṭangin palite'n an pe a ni.

Students’ Self-Support Union (SSU) Gen. Hqrs chuan nimin May 27 kha SSU din champha vawin 35-na a ni tih tarlangin, an din champha pual hian Mizoram hmun hrang hranga SSU member-te leh zirlai, mahni intodelh kawnga hma la mekte chibai an bûk. "SSU member-te'n kan tum leh din chhante hre reng a, kan awm hmun ṭheuhah theihtawp chhuah zel turin kan inngen a, ram leh hnam hmasawn nana intodelh leh kut hnathawh nunpui zel turin kan infuih nawn leh a ni," an ti.

Border Security Force (BSF) 131 battalion-te chuan an commandant KS Nautiyal-hoin nimin khan thing leh mau chereu zel tur ven nan thing phun beihpui an thlâk. Thing phunnaah hian BSF sipai 225 an hnatlang a, thing ṭiak 400 vel an phun a ni. 

Nimin tlai dar 2:30 vel khan ruahsur vangin Leitan Presbyterian Kohhran hall thlanga lei a min a, kohhranin in a sak mek a chim tel bakah, a chhaka biak-in pawh a dinhmun a him lo hlea ngaih a ni. In sak mek chim ta hi Leitan Kohhranin kum 2023-a an kohhran golden jubilee puala an 

sak a ni.