Thisen cancer damdawi thar hmuchhuak lo

Indian Medical Association (IMA) Mizoram State Branch hruaitute chuan, thisen cancer damdawi hmuhchhuah thar a ni lo tih an sawi a; tun hnaia thisen cancer damdawi hmuh chhuah thar anga social media-a theh darh chu thu dik lo a nih thu an sawi.

IMA hruaitute chuan, "Damdawi advertise vak hi medical ethics-in a remti lo a, center ṭhain an ti ngai lo. Adyar Cancer Institute, Chennai-a mi phei chuan an tih loh thu press-ah an puang hial a ni. Cancer damdawi hi tun maia hmuhchhuah a ni lo a, India rama cancer center leh cancer hospital hrang hrangte'n an hmang reng tawh zawk a ni," an ti.

IMA Mizoram Branch honorary secretary Dr John Zohmingthanga chuan, social media-a thisen cancer damdawi tia tarlan 'Imitinef Mercilet' tih chu a dik lo tih sawiin, "A teuh ber chu Imatinib Mesylate damdawi, Gleevec tih hminga siam a ni," a ti.

Dr John Zohmingthanga sawi danin, Imatinib Mesylate hi thisen cancer chi khat, Chronic Myeloid Leukaemia (CML) tan bika siam leh enkawlna tur, ei chi a ni a, thisen cancer zawng zawng tan a ni lo. He damdawi hi tun hnaia hmuhchhuah a ni lo a, India rama cancer center leh cancer hospital hrang hrangte'n an hmang reng tawh a ni.

Imatinib Mesylate hi cancer center/hospital hrang hrangah a thlawna hmuh theih dan a awm a, cancer specialist-te'n an ngaihtuahsak fo ṭhin; specialist-te enkawlna hnuaia ei leh hman ngei tur a ni. Media hmanga damdawi advertise hi thil dik lo a ni a, damlote beiseina dik lo a pek theih bakah, imbumna a nih palh theih avangin medical specialist-te biak ráwn hmasak a him fo
ṭhin tih a sawi.