MPC-in budget lungchhiatthlak an ti

MPC party chuan, kum 2016-17 chhunga Mizoram budget cheng vbc. 8,066 aṭangin hmasawnna hna thawhna tur cheng vbc. 1,172.80 chiah a awm chu lungchhiatthlak an tih thu an sawi.

MPC office bearer-te chu nimin khan an pisaah senior vice president Vanlalhlana hoin an ṭhukhawm a, tunlaia Mizoram politics leh kum 2018-a Assembly general election awm turte an thlirho. Thuchhuah siamin, kum 2016-17 Mizoram budget chu Congress party-in chhuang hle mah se, Mizoram mipui tan lungchhiatthlak an tih thu an tarlang a ni.

MPC thuchhuah chuan, kum 2016-17 budget-ah cheng vbc. 8,00 aṭangin vbc. 1,172.80 chauh hmasawnna hna thawhna tur a awm tih sawiin, "Kum 2016-17 tawpah cheng vbc. 7,290 leibâ kan nei tur phei hi chu Zoram mipui tan retheihna belhchhah tur budget a ni ringawt," a ti.

Hetih lai hian, Tripura budget 2016-17 ah chuan hmasawnna hna thawhna tur cheng vbc. 6,995 a awm nia sawiin, awhawm an tih thu an sawi.

NLUP hman a nih hnuah a kum têlin kut hnathawktute sum thawh chhuah tlem tial tial nia sawiin, MPC chuan, "Kum 2009-10 a GSDP 20% a nih laia kum 2014-15 GSDP 17.5% lek a ni ta hi pawi kan ti hle," an ti. Tripura, Sikkim, Maghalaya leh Bhutan-te electric power-ah an intodelh mai ni lo, state dangah tam tak an hralh theih tawh laia tuna Mizoram dinhmun chu lungchhiatthlak an tih thu an sawi bawk.