District tinah Independence Day lawm a ni

August 15, Inrinni khan Mizorama district headquarters tinah leh khaw dang ṭhenkhatahte Independence Day vawi 74-na lawm a ni. I-Day hi district tinah minister-te'n an hmanpui a, khaw dang ṭhenkhatah an hmanpui bawk.

Lunglei: Independence Day hi Lungleiah chuan Convention Centre kawtah lawm a ni a, khuallian C Lalrinsanga, minister-in hnam puanzar a pawt pharh. Minister hian Lunglei district-a sorkar hmalaknate a sawi a; State Finance Commission hnuaiah kum 2019-20 financial year chhungin Lunglei district (undivided)-a VC 143 hnenah cheng nuai 175.125 pek a nih thu a sawi. 

Siaha: Siahaah chuan DC pisa tualah lawm a ni a, minister of state Dr K Beichhua'n hnam puanzar a pawt parh. K Beichhua chuan, I-Day chu Covid-19 vangin duhthusamin hmang thei lo mah se, zalenna pawimawhzia chu thinlunga vawng nung zel turin mipui a chah a; sorkar hmalakna hrang hrang a tarlang nghal.

Champhai: Champhaiah chuan bawrhsap pisa tualah I-Day lawm a ni a, minister of state Lalruatkima khuallian a ni . Minister-in hnam puanzar a pawt pharh a, police contingent-in hnam puanzar chibai an bûk a chháng lêt. Sorkar hotu te, tlawmngai pawl hruaitute leh chanchinbu mite an tel.

Kolasib: Kolasib-ah chuan DC pisa tual záwlah lawm a ni a, Assembly deputy speaker Lalrinawma'n hnam puanzar a pawt pharh. March past a awm lo a, St. Maria Pipe Band leh Kolasib Vengthar Branch YMA Zaipawlte'n hun an hmang thung.

Serchhip: Serchhipah chuan chawhma dar 11-ah Home minister Lalchamliana hoin DC pisa tualah lawm a ni. Khuallian hian Covid-19 donaa Serchhip district-a community quarantine facility thawhtu kohhrante hnenah lawmthu sawina thilpek a hlàn. Zing lamah Serchhipa home hrang hrang leh damdawi-inte hnenah thilpek hlan a ni bawk.

Lawngtlai: Lawngtlaiah chuan zing dar 8-ah Health minister Dr R Lalthangliana hoin Central YLA khelmualah lawm a ni. Minister chuan, Mizorama Covid-19 léng leh lirnghing leh chhiatna dang thlengin a nghawngte a tawrhpui thu sawiin, "Covid-19 dona kawngah Mizoram chu India rama state leh UT zinga ti ṭha ber (best performing state)-ah thlan a ni," a ti.

Health Minister hian chawimawina leh lawmpuina chi hrang hrang a sem a; chu'ng zingah chuan AIR Weekly Award & Monthly Award dawngtu Lalngheta Ralte leh, Covid-19 donaa hlawh nei loa thawk tura inpe mi 16 (quarantine centre-a thawk mi pali leh district hospital-a thawk mi 12)-te an tel.

Mamit: Mamitah chuan DC Complex-ah lawm niin, minister of state Lalchhandama Ralte-in hnam puanzar a pawt pharh. Minister hian Mamit district-a village task force tin hnenah lawmthu sawina chawimawina thuziak a hlan a; huaisen chawimawina Jeevan Raksha Padak chu C Lianhawla, Tuidam hnenah a hlàn bawk. Inkhawm zawhah DC banglaah VIP At Home buatsaih a ni.

Saitual: Saitualah chuan Saitual College kawtah lawm niin, minister of state K Lalrinliana khuallian a ni. Minister chuan, Saitual leh district thar dangteah FCSCA department-in DCSO office hawnna tur ruahmanna hotute hnenah thlen a ni tawh tih a sawi a, "Supply department ka enkawl hnuin kudam 10 sak thar a ni tawh a, tunah 21 dang sakna tur peih thawkhat a ni," a ti.

Khawzawl: Khawzawlah chuan deputy chief minister Tawnluia hoin Zuchhip Khelmualah lawm a ni a, MLA pahnih - Dr ZR Thiamsanga leh C Lalmuanpuia ten an hmanpui. Tawnluia chuan, Khawzawlah DC leh SP office-te'n changtlung taka hna an thawk mek thu te, damdawi-in chu February 14, 2020-ah district hospital-a hlànkai a nih tawh thu te, Treasury leh Revenue office hawn theih tura buatsaih mek a nih thute a sawi.

Hnahthial: Hnahthialah chuan HBSC Ground no.1-ah lawm a ni a, minister of state TJ Lalnuntluanga khuallian a ni. Hnahthial Officers Club-in kawng hrang hranga Hnahthial district chawimawitu leh mi hlawhtling panga an thlante hnenah chawimawina hlan a ni.

Independence Day hi minister of state Robert Romawia Royte-in Thenzawla hmanna, SDC(C)-ah a hmanpui a; Covid-19 donaa medical team mi 12-te leh Police Medal for Meritorious Services, 2020 dawngtu Lalṭhakima hnenah chawimawina a hlân.

Hriat theih chinah, Independence Day hi Chief Minister's Office tualah te, Gauhati High Court, Aizawl Bench-ah te, Mizoram University-ah te, SDO (Civil) leh BDO ṭhuthmun khaw hrang hrangahte hman a ni.