Online hmangin Science Congress neih a ni
Mizoram Science Congress Organizing Committee chu May 26, Thawhlehni tlai khan Directorate of Science & Technology conference room-ah an ṭhu a; Mizoram Science Congress neih tur chu Covid-19 lêng vanga tihphung pangngaia neih theih a nih dawn loh avangin online-a neih an rél.
Ṭhutkhawm hi chief scientific officer leh Organising Committee chairman Dr RK Lallianthanga'n a kaihruai a; Mizorama science kaihhnawiha intawh khawmna lian ber Mizoram Science Congress 2020 buatsaih an lo tum tawh chu Covid-19 lêng vangin kum danga an buatsaih ṭhin anga buatsaih loh mai an rél a ni.
Online-a Science Congress neih dan tur an ruahman a, a hmingah Mizoram Science Congress 2020 (Online) an vuah. Thupui tur chu 'Science as a soul of prosperity and sustenance' tih a ni ang.
Thupui hmang hian thil chi hrang hrang - online international level conference te, zirlai leh Mizo tualchher thil siam thiamte pualin online exhibition buatsaih tum a ni. Science lam zirbingna (research) ti mekte tan pawha lukhâwng nei lehzual turin online presentation bakah, Congress pualin research publication siam an rél bawk.
Meeting-ah hian Mizoram Science, Technology & Innovation Council (MISTIC), Mizoram Science Society, Mizo Academy of Sciences, Science Teachers’ Association Mizoram, Geological Society of Mizoram, Biodiversity & Nature Conservation Network leh Mizoram Mathematics Society (MMS) aiawhte an tel a ni.