Central thu angin November 2020-a Kawlphetha hman man tihhniam a ni

Electric bill tihhniam hi Covid-19 léng vanga mipui harsat­na chhawk zângkhàina tura ruahman a ni a; hemi chungchangah hian Mizoram sorkara Power & Electricity department-a engineer-in-chief Lalduhzuala Sailo chuan November 6, 2020 khan hriattirna (circular) a lo tichhuak tawh a, electric bill tihtlem chu November 2020 thla bill-ah hman tur a nih thu a tarlang.

P&E Engineer-in-Chief tarlan danin, Mizoram sorkarin kawlphetha a leina atana a hman ṭhin cheng nuai 752 chu sorkar laipuia Ministry of Power thu angin Mizoram sorkarin a pek a ngai lo a; kawlphetha leina man a pek ai chu mipui (consumer)-ah sem ral tura tih a ni.

P&E Engineer in Chief-in circular a chhuahah chuan, "Covid-19 hripui léng vanga Ministry of Power (MoP), Government of India thupek anga GENCOM-ten power kan leinaa rebate min pek cheng vbc. 7.52 chu consumer tinte energy bill-ah tihtlem (deduct) tur a ni," tih a ni. Sorkarin lehkha No.B.30011/12/2012-P&E/Pt Dt.30.09.2020 a approve tawh anga P&E department hotute'n an bial ṭheuha hma an lâk dan tur a tarlang nghal bawk.

Kawlphetha man tihtlem dan

1.    Consumer-te fixed charge aṭanga energy bill tihtlem (deduct) tur a ni.

2.    Energy bill titlem (deduct) tur hian consumer tinte contracted load aṭangin 1kW zelah Rs. 201.67-a tihtlem tur a ni. Hetah hian contracted load hi round off tur a ni lo.

3.    Energy bill tihtlem hi vawi khat chauh, November thla bill December 2020 thlaa pek turah tihtlem tur a ni ang.

4.    Energy bill tihtlem hian August 2020 hnu lama consumer service connection la tharte a huam lo ang.

5.    Energy bill tihtlem hian consumer category public water works leh public lighting (street lighting)-te a huam lo ang, dan pangngaiin bill siam tur a ni.

6.    Energy bill tihtlem hian SAP, stand alone leh manual-a bill siamte a vaiin a huam vek a ni.