Lawngtlai dist.-a inbiakpawhna tihchangtlun mek dan sawiho
May 26, Thawhlehni khan Lawngtlai DC conference hall-ah district bawrhsap Shashanka Ala hoin Comprehensive Telecom Development Plan for North Eastern Region (CTDP-NER) hnuaia Bharti Infratel Ltd. (Airtel) mi leh sate nen Lawngtlai district-a inbiakpawhna tihchangtlun kawnga hmalak dan sawiho a ni.
Lawngtlai DC chuan, CTDP hnuaia an district chhunga inbiak pawhna tihchangtlun a ni mek chu lawmawm a tih thu sawiin, "Tun hmaa mobile network awm lohna hmun tam taka mobile network awm thar hian hma sawnna hna dang thawhna kawngah pawh nasa takin a pui dawn a ni," a ti.
Shashanka Ala chuan, network ṭha a awm reng theih nan hna thawktute chu theihtawp chhuah turin a chah a; SIM (Subscriber Identification Module) card pek chhuah chungchangah, Lawngtlai district chu ramri hnaiha awm a nih avangin identity card rintlak tak neite hnenah chauh pe chhuak turin a chah bawk.
CTDP hi sorkar laipuia Department of Telecom hnuaia Universal Service Obligation Fund (USOF) aṭanga thawh a ni a; Bharti Infratel Ltd. chuan August 2018
aṭang khan Lawngtlai district-a khaw hrang hrangah Airtel mobile tower thar din turin hma an la ṭan a ni.
Meeting-a an tarlan danin, a tirah hmun (khua leh kawngpui) 114 tuam tura ruahman a ni a, chhan eng eng emaw avangin hmun 95 an tuam leh ta zawk. Tower 84 din tura ruahman a ni a, chu’ng zinga 74 chu zawh tawh niin, a taka hman a ni tawh.
Tower din fel tawh, a kháwl pawimawh la dah kim loh pasarih a awm a, inkhàrkhip vangin hna thawktute an kal thei lo a, hna chawlhsan rih a ni. Tower la din lohna hmun pathum a awm a, hmanrua leh thawktute lak luh theih a nih hunah ni 45 chhunga zawh theih a nih thu tarlan a ni bawk.