Myanmar sipai Mizorama tlânchhiate Police-in an man; Myanmar-ah thawn let

Myanmar rama Chin mipui sipai People's Defence Force (PDF) leh Myanmar sipaite nimin khan an inbeih chhunzawm a, Mizoram lamah Myanmar sipaite tlânchhe lutin, mi 43 man an ni a, nimin vêk khan thuneitute hnenah hlan niin, Myanmar lamah thawn lêt an ni.

Thu dawn danin, PDF sipaite hian Rihkhawdara Myanmar sorkar sipai camp an lâk hnuah November 13, Thawhṭanni tlai dar 4 vel khan Khawmawi tlanga sipai camp an la leh a, camp an lâkte chu an hâl zel a ni. PDF-te'n Myanmar sipai camp an lâk hnuah camp-a awm sipaite chu tlânchhiain, Mizoramah an tlân lut a, Mizoram police-in an lo man a ni.

Vanglaini palai zawhna chhangin IGP (Hqrs.) Lalbiakthanga Khiangte chuan, Myanmar sipai Mizorama tlânchhia Mizoram police-in an mante chu mi 43 an nih thu a sawi a, "Central lamin an rawn ngaihven nghal a, central force kutah an awm vek tawh. An awm zel dan tur chu central sorkar thu thu a ni," a ti.

Hetih lai hian, Zokhawthar YMA hruaitute chuan, Myanmar sipaite chu Hnahlan aṭangin Myanmar-ah thawn lêt an nih thu an sawi. Hnahlan YMA hruaitute chuan, zing dar 9 velah Assam Rifles-in helicopter-in an thawn let thu an sawi bawk.

YMA, Zokhawthar Branch vice president Lalsangzuala chuan, Myanmar sipai mante chu November 13, Thawhṭanni zan leh nimin zinga man an nih thu a sawi a, "Mizoramah an rawn lut a, ṭhingṭhiin Kawl ṭawngin an in surrender (inpek) thu an sawi a, police-te'n an lo man a ni. Sipaite chu police leh khawtlang hruaitute'n an véng ṭha a, mipui thinrim viau mah se, kan inkhap dái a, kut inthlâk a awm lo," a ti.

November 13, Thawhlehnia inbeihnaa PDF mi leh sa hliam mi 18, Champhai District Hospital-a lak zinga pakhat chu Thawhlehni zan tìr lam khan a thi tih Zokhawthar YMA hruaitute chuan an sawi a, mi pasarih chu Aizawla enkawl turin thawn a nih thu an sawi bawk.

Nimin chhun khan Myanmar sipaite'n Kalemyo (Tahan) lam aṭangin helicopter hmangin Rihkhawdar leh Khawmawi beih an tum a nih rinna a awm thu sawi a awm avangin Khawmawi leh Zokhawthar mipui an rálkhêl hle a, Zokhawthar YMA pawhin vantlang aurinna hmangin fimkhur turin mipui an chah a ni. Mahse, nimin chhun lam aṭang chuan inbeihna thar a awm lo tih an sawi.

Khawmawi leh a chhehvel aṭanga sahimna zawnga Zokhawthara tlan lutte chu an khaw lamah an la lêt lo a, Myanmar sipaite'n an la rawn bei thut theia ngaih a nih avangin PDF lamin Khawmawi lama let an phal rih lo niin YMA hruaitute chuan an sawi.

Khawmawi mipui chu Zokhawthar lamah an lut vek rih a, chhungte leh lainate belh tur neiin an bèl a, belh tur nei mai lote chu YMA hall-ah an awm khawm a, Zokhawthar YMA-in ei leh in tur an buatsaihsak ṭhin a ni.