Scho' pek phûtin MSB pisa bulah MZP-in punkhawm an huaihawt

Mizoram sorkarin zirlaite hnena scholarship second instalment a pek chhuah har avangin MZP General Headquarters chuan nimin khan Mizoram Scholarship Board pisa kawtah lungawi lohna an lantir a, vawiinah pawh lungawi lohna lantir leh an tum.

Sit-in demonstration-ah hian MZP president H Lalthianghlima chuan, scholarship chungchanga harsatna chu dawhkana sawi fel theih an duh thu sawiin, "September 25, 2023 aṭanga chhûtin thla khat chuang a liam tawh a, hetiang ti lo thei loah hian scholarship buaipuitute hian min siam a ni. Vawiina kan hmalaknain rah ṭha a chhuah lo a nih chuan kan kal na dawn," a ti a, total bandh a ngai a nih pawhin an tih hreh dawn loh thu a sawi.

MZP President chuan, ni 40 chuang sorkarin zirlaite scholarship sum a hréng chu an dem thu sawiin, "Zirlaite ta tur scholarship cheng nuai 1,700 chuang engati nge ni 40 chuang an kawl? Zirlaite ta tur chu pe mai rawh se. Nakumah pawh scholarship chungchang hi kan en zui zel dawn a, hetiang buaina hi a thleng leh a nih chuan kumin ang hian kan nghak tawh dawn lo," a ti.

Sorkar laipui aṭanga sum rawn kalte a hmanna turah hman a nih leh nih loh an en zui dawn tih sawiin Lalthianghlima chuan, "Sorkar thar kan nei thuai dawn a, tute pawh sorkar se, zirlaite pual scholarship hi kan vil reng dawn. Zirlaite chanvo humhim tur chuan MZP hian thâ kan thlah dawn lo a, a tawp thlengin hma kan la zel ang," a ti bawk.

Punkhawmah hian scholarship sem thuai an duhzia tarlanna thuziak (placard)-te an keng a; 'Scholarship second instalment hi sem thuai ni rawh se' tih te, 'Zirlaite hi min ngaihsak rawh se' tih leh, 'Min pek loh chuan kan nawr zel dawn' tihtein an au rual a ni.

MZP thuchhuah tarlan danin, nimina an hmalaknain awmzia a neih loh avangin vawiin chawhma dar 10 aṭangin MSB pisa kawtah sit-in demonstration an huaihawt leh dawn.

MSB-in Election Commission of India-ah phalna an lâk ngai nia an sawi avangin MZP chuan nimin vêk khan Mizoram Joint Chief Electoral Officer hmuin, zirlaite scholarship pek chhuah vat a ṭul thu an sawipui. Election Commission of India hnenah pawh zirlaite scholarship pek chhuah phalna pe turin ngenna lehkha an thawn nghal bawk.