Mizoramah thla sarih chhungin lirthei 15,498 ziah luh a ni

Mizoram sorkara Transport department chuan October 31, 2023 thleng khan lirthei 2,98,532 an ziak lut (register) tawh a; kumin 2023-a thla sarih (April 1 - October 31) chhungin lirthei 15,498 an ziak lut a, chu'ng zinga 11,591 chu two wheeler a ni.

Transport department tarlan danin, lirthei ziah luh tawh zinga tam ber chu two wheeler niin, 2,03,577 a ni a, lirthei ziah luh tawh zawng zawng 2,98,532 aṭangin 68.19% a tling. A dawttu chu car niin, 50,421 a ni a, lirthei ziah luh tawh zat aṭangin 16.88% a ni.

Sumdawnna lirthei, bungraw phur chi 21,647 (7.25%) ziah luh a ni tawh a; three wheeler (auto-rickshaw) 5,911 (1.98%), motor cab (taxi) 5,847 (1.95%), two wheeler taxi/rental 3,402 (1.01%), maxicab 2,396 (0.80%) leh bus 578 (0.19%) ziah luh a ni tawh.

Transport department tarlan danin, kumin April 1 leh October 31 inkar chhungin Mizoramah lirthei chi hrang hrang ziah luh thar 15,498 a awm a, chu'ng zingah chuan two wheeler tam berin, 11,591 a ni. Car 2,739, sumdawnna lirthei bungraw phur chi 788, three wheeler (auto-rickshaw) 133, two wheeler taxi/rental 85 leh motor cab (taxi) 45-te chu lirthei pung tam zual a ni.

Hetih lai hian, bus erawh chu 10-in a tlem thung a; sorkar kum liam ta tàwp ni, March 31, 2023-ah aiin October 31, 2023-ah Mizorama lirthei ziah luh tawh sa 13-in a kiam a ni.