Phalna nei loa SIM card zuar mi pasarih police-in an man

Aizawl Police Sta-tion-a awm police-te chuan November 13, Thawhṭanni leh nimin khan phalna nei loa SIM card zuar mi pasarih an man.

Police-te chuan New Market leh Israel Point velah phalna nei loa SIM card zuar an vâi a, Thawhṭanni khan mi 13 an man a, nimin khan mi pakhat an man leh bawk. Mi pasarihte chu mipa panga leh hmeichhia pahnih an ni a, an lakah mi bum thubuai ziah luh a ni.

SIM card zuartute'n police-te an hrilh danin, SIM card chu mi pahnih hnen aṭangin pakhat Rs 150 leh Rs 250 (Airtel bik)-in an lei a, Rs 500-in an zuar chhâwng ṭhin.

Mi pasarihte chuan an chenna hmun (address)-ah Aizawl an inti a, mahse, mi pali chu Myanmar aṭanga rawn raltlan an ni tih finfiah a ni. Mi dangte pawh Myanmar aṭanga rawn kal nia hriat a ni bawk.

Police-te chuan, SIM (subscriber identity module) card zawrh ve tawp chu danin a phal loh a nih avang leh SIM card-a hming tumtu leh a leitute tan a him loh avangin hma an la a; dan loa SIM card zawrhnaa inhnamhnawihte an chhui zui zel a ni.