MZU-ah international conference hmang

Mizoram University-a School of Medical and Paramedical Sciences chuan nimin khan MZU auditorium-ah ni thum awh tur 'Emerging Trends in Psychological Interventions (Health and Allied Sciences): Future Prospects and Challenges' tih thupui hmangin international conference an buatsaih a, Governor Dr Hari Babu Kambhampati-a'n a hawng.

Governor chuan, khawvel hmasawnna sang zelah sum leh pai, ei leh bâr leh hmasawnna lamah intlansiakna a nasa tih sawiin, chu chuan nasa takin rilru hriselna a titlahniam niin a sawi a, "Tunah hian rilru lama harsatna tâwk vangin mi tam tak an buai mek a, mi tam tak an thih phah mek bawk. Chuvangin, rilru lama mithiamte thawh tur leh chonna tam tak kan khawtlang nunah a awm mek a ni," a ti.

Hari Babu Kambhampati chuan, "Psychology lam mithiamte leh zirlaite'n mawhphurhna pawimawh tak an nei a, chonna lian tak an hmachhawn mek a ni," a ti a; rilru lam hriselna chungchanga khawvela mithiam rualte intawhkhawmna MZU-in a thleng chu thil ṭangkai tak a nih a beisei thu a sawi. Larsap hian conference souvenir a tlangzarh nghal a ni.

Khualzahawm Justice Nelson Sailo, Gauhati High Court judge pawhin thu sawiin, dan leh hrai kaihhnawih lam aṭangin rilrua harsatna tâwkte dinhmun a sawifiah.

Conference hawnnaah hian MZU vice chancellor Prof. Dibakar Chandra Deka, conference convener Dr Laxmi Narayna Rathore leh director Prof. Zokaitluangi te pawhin thu an sawi.

Ni thum chhungin Mizoram leh India ram chhung bakah, ram hrang hranga mithiamte paper buatsaih an zirho dawn a ni.