Traffic signal light enchhin zel rih dawn

Aizawl Traffic Police chuan November 13, Thawhṭanni aṭanga Bazar Bungkawn leh Bawngkawna Adaptive Traffic Control System, traffic signal light an enchhin chu an la kalpui zel a, enchhinna a nih avangin la kalpui zel rih an tum.

Vanglaini palai zawhna chhangin Traffic SP Stephen Lalrinawma chuan, traffic signal light enchhinna chu an kalpui zel phawt rih dawn tih a sawi a, "Enchhinna a ni a, peak hour (lirthei tlan tam zual lai)-ah kan enchhin ngam lo a, traffic thâwl tawh hnuah kan enchhin a ni. Kan enchhin tawh chinah hma kan sawn ve hret chuan kan hria," a ti.

Traffic SP chuan, traffic signal light an enchhin chin bikah, a ni khatna (Thawhṭanni) ai chuan a ni hnihna (Thawhlehni)-ah hma an sawn hreta an hriat thu a sawi a, "Hma kan sawn hret chuan kan hria a, mahse, a hma (traffic signal light enchhin hma) aiin a tihnawk zawk deuh chuan kan hria," a ti a; khawpui dangahte pawh thla khatte an lo enchhin tawh avangin enchhinna chu la kalpui zel rih an tum thu a sawi.

Aizawl hmun pahniha ATCS traffic signal light hman mek chu enchhinna a nih angin, lirtheite a lo ding rei deuh ṭhin a nih pawhin dawhthei taka nghâk hrâm hrâm turin Traffic SP chuan lirthei khalhtute a ngen a ni.