ODF Plus-a puang turin endik mek

Open Defecation Free (ODF) Plus atan Khawzawl district puan theih a nih dawn leh dawn loh tunlai hian enfiah mek a ni.

Khawzawl PHE executive engineer Liantluanga Chohte sawi danin, Khawzawl district-a thingtlang khaw 25-te chuan ODF Plus model village ni tura tehfung hrang hrang awmte an tlin vek tawh a, enfiahna kalpui mek niin, November 2023 chhung ngeia zawh tum a ni. Enfiah zawhah Khawzawl district chu ODF Plus model village-a puan nghal theih beisei a ni.

Khawzawl district hi páwn lama inthiar awm lohna ODF a ni tawh a, ODF Plus-ah puan a nih theih nan endik leh mek a ni. ODF Plus ni tur chuan bawlhhlawh ṭawih thei leh thei lo thliar hran te, plastic waste collection centre neih te, community soak pit leh composed pit neihte a ngai a, tehfung dang eng emaw zat a awm bawk.

ODF Plus hi tehfung hrang hrang an neih dan azirin aspiring, rising leh model-ahte ṭhen a ni a; Khawzawl district-a khaw 25-ah hian Swacch Bharat Mission (Gramin) leh 15th Finance Commission hmangtein ODF Plus ni tura ṭul leh pawimawhte siam vek tawh a ni.