COVID-19: Mizoram dinhmun Hripui vei mi 5 hmuh belh a ni

December 13, Pa­thianni khan Mizo­ramah Covid-19 vei mi panga hmuh chhuah a ni a; nimin khan hripui laka fihlîm tawh mi 22 chhuahtir an ni thung. Mizorama Covid-19 positive hmuh tawh zat chu mi 4,040 an ni a, mi 164 enkawl mek an ni.

Covid-19 vei Pathian­nia hmuh chhuah tharte chu Rapid Antigen Test (RAT) hmanga hmuh chhuah an ni a; ZMC laboratory-ah swab sam­ple endik a ni lo a, district pangaah TrueNAT-PCR hmangin mi 77 sample endik ni mah se, hripui vei hmuh a ni lo.

Hripui vei hmuh thar zinga pali chu Bawngkawn, Aizawla chhungkaw pakhata mi an ni a, mipa kum 25 & 27 leh hmeichhia kum 30 & 55 niin, natna lang chhuak vek an ni. Nu ber hi SRH-ZMC staff nurse, Covid-19 veite enkawltu zinga mi a ni.

Covid-19 positive dang pakhat chu Sihphir Venghluna mipa kum 62, tualchhunga hri kái a ni a, symptom a nei lo. RAT hmangin district pariatah sample 222 endik a ni a, Pathiannia sample endik zawng zawng chu 299 niin, chu'ng aṭanga Covid-19 positive hmuh chu 1.67% a ni.

Covid-19 positive-te enkawlna hmun aṭangin hripui laka fihlîm tawh nimin khan mi 22 chhuahtir an ni a; Aizawl leh Kolasib district-ah mi pakhat ve ve, Lunglei district-ah 13, Lawngtlai district-ah panga leh Mamit distirct-ah pahnih an chhuak.

Mizoramah swab sample 1,64,535 endik tawh aṭangin Covid-19 positive mi 4,040 (2.45%) hmuh chhuah a ni tawh a, mipa 2,973 leh hmeichhia 1,067 an ni. Nimin tlai dar 5 thleng khan mi 3,869 (95.77%) chhuahtir an ni tawh a, mi pasarih (0.17%) thi tawhin, enkawl mek mi 164 (4.06%) an awm.

Mizorama Covid-19 positive hmuh chhuah tawh mi 4,040 zinga mi 1,912 chu Mizoram chhunga kái an ni a, mi 2,128 chu state páwn aṭanga rawn lût an ni.