Rawn hawte vil dan tur sawiho a ni

Kolasib bawrhsap Dr H Lalthang­liana kaihhruaiin nimin khan DC conference hall-ah Madhya Pradesh, Gujarat leh Karnataka aṭanga Mizoram mi leh sa rawn haw turte dawnsawn dan tur sawiho a ni. Rûi chunga lirthei khalhah tu mah an chuantir dawn loh thu leh, chu mi tur chuan uluk takin lirthei khalhtute hriattir ṭhin a nih thu an tarlang.

Meeting-a an sawi danin, Madhya Pradesh, Gujarat leh Karnataka aṭanga rawn haw mekte chu thlipui leh leimin vangin an rawn thlen hun tur tak hriat a ni lo. Thlipui leh ruahsur thawk thut thei a nih avangin Bairabi rél chawlhhmun pawh a ṭul anga thawm ṭhat a ni a, ruahsur laia screening kalpui theih a nih dawn loh avangin, tangkhang lo hawte chuan rél chhungah an lo nghah a ngai dawn.

Bairabi-a rél lo thleng tur zing­ah Tripura mi leh sa, an state lama kaltlang zel tur eng emaw zat an awm a, chu'ng mite chu Bairabi rél chawlhhmunah ei tur pek a ni ang.

Rawn hawte Bairabi aṭanga district hrang hranga phurtu tur bus-te chu a huhoa tlantir tur a nih dawn avangin, kawng tluana viltu (escort officer) tur ruat belh a ni a; escort officer-te chuan kawng lakah hrisel lohna vang emaw, loh theih loh vang a nih loh chuan bus aṭanga chhuak an awm lohna turin an vil dawn a ni.

Madhya Pradesh leh Gujarat aṭanga rawn hawte tan hian bus 32 ruahman a ni a, Karnataka (Bangalore) aṭanga rawn hawte phurh nan bus 81 ruahman a ni thung.

Dr H Lalthlangliana chuan, Kolasib district chhungah quarantine facility buatsaih hrang hrangahte mi 749 an awm theih thu a sawi a, "Hengah hian mi 190 an awm mek a, home quarantine awm miah loa kalpui tum a ni," a ti.