MPC mi leh sate hi kan unaute an ni - ZPM Ṭhalai President

ZPM Ṭhalai president Malsawmzuala chuan, MPC party mi leh sa, tláng hrang hranga awmte chu an unaute an nih thu sawiin, MPC dintu Brig. T Sailo (L) hmathlirte chu tihhlawhtlin tumin ZPM-in theihtawp an chhuah zel thu a sawi.

ZPM Ṭhalai President hian nimin khan thuchah tichhuakin, "MPC mi leh sate'n Brig. T Sailo-in Mizoram tana hmathlir ropui tak a neihte hlawhtlinna hmuh an duhna leh beiseina hlen chhuak turin ZPM chuan theihtawp a chhuah zel a ni," a ti a; kum 2018 MLA in­thlanpuia ZPM huang chhunga theihtawp an lo chhuahna leh ZPM chu beiseina awmchhun a nih thu an lo sawi ṭhin chuan ZPM-te chakna thar a pek ṭhin thu a sawi a ni.

Bairabi-a rél a luh theihna tura Brig. T Sailo remhriatna leh ṭhahnemngaihna fakawm an tih thu sawiin Malsawmzuala chuan, "Kum 1981-ah Pu Ṭhena'n lungphùm phúma chak taka a hmalakna leh Pu Hawla ministry-in a chhunzawmna azarah Mizorama rél a lo lut thei hi chhinchhiahtlak a ni. Covid-19 hripui vanga state danga tangkhangte phurh hawna atana ṭangkai lehzuala hman a ni hi a lawmawm hle," a ti.