Saikhumphaiah Myanmar râltlân an lut; Káwl sipai 29 Mizoramah luh an tum

Myanmar rama buaina kal mekah mipui sipai, Chin National Defence Force (CNDF) chuan November 14, Thawhlehni zan khan Tuibuala Myanmar sipai camp beiin, an la zui. He inbeihna avang hian tualchhung mi Zo hnahthlak eng emaw zat Mizoram lama Saikhumphaiah an tlânchhiat bakah, Myanmar sipai 29-te nizan khan Mizoramah luh an tum nia hriat a ni.

YMA, Saikhumphai Branch hruaitute'n Vanglaini palai an hrilh danin, November 14, Thawhlehni zan dar 11-12 vel khan mipui sipaite'n Tuibual khuaa Myanmar sipai hmun an la a ni. Sipai camp beih avang hian nimin zing khan mi 600 vel chu Saikhumphaiah an tlân lut a, Saikhumphai mipuiin an lo buaipui.

Myanmar sipai camp-a awm sipaite chu an tlânchhia a, nimin lam khan Myanmar sipai 29 chu Mizoram lamah tlân luh an tum nia hriat a nih avangin lo dawngsawng turin Saikhumphai leh Vaphai khawtlang hruaitu te, Assam Rifles mite bakah, Champhai aṭangin SDPO hoin police-te an kal a, nizan dar 6:30 thleng khan Saikhumphaiah an lo nghak a ni.

Myanmar sipaite hian kawng an bo avangin Mizoram (Saikhumphai)-ah an lut mai thei lo niin Saikhumphai YMA hruaitute chuan an sawi a; he thu ziah lai thleng hian an la lut lo. Mizoramah an rawn lut a nih pawhin, Assam Rifles leh police-te venhimna hnuaiah Myanmar lamah thawn kîr an nih a rinawm thu an sawi bawk.

Thu dawn danin, Myanmar Chin state-a mipui sipai pawl hrang hrangte'n Myanmar sipai hmunte tun hnaiah an bei ṭhin a, a tam zawk chu an la tawh. Chin state-ah Paletwa township chauh mipui sipai kuta la awm lo a nih thu Tahan Post chuan a tarlang.

Tarlan tawh angin, November 12, 2023 Pathianni zan tir aṭangin People's Defence Force (PDF)-te'n Khawmawi leh Rihkhawdar khuaa Myanmar sipai hmunte an lo bei tawh a, hun eng emaw chen an inbeih hnuah sipai camp-te chu an la ve ve a ni.

Khawmawi sipai camp aṭanga Kawl sipai tlanchhia mi 42 chu November 13 zan leh November 14 zing khan Mizoramah lutin Mizoram police-in an lo kawl a; Ministry of Home Affairs thu anga Assam Rifles hnena an hlan hnuah AR-in Hnahlanah an hruai a, Hnahlan helipad aṭangin Myanmar-a thawn haw turin Indian Air Force helicopter-in phurh chhuah an ni.