Mizoramah thla 10 chhungin TB vei mi 1,929 hmu chhuak

Kumin January-October chhungin Mizo­ramah ngawr natna, tuberculosis (TB) vei mi 1,929 hmuh chhuah a ni a, kumin January-June (thla ruk) chhungin TB vangin mi 62 an thi.

Mizoram sorkara State TB Cell bultumin nimin khan Secretariat Conference Hall-ah review meeting neih a ni. Ṭhutkhawma tarlan danin, January-October, 2023 (thla 10) chhungin Mizoramah TB vei rinhlelh mi 12,309 zingah TB vei mi 1,929 hmuh chhuah a ni a, endik zat hi Mizoram mipui mi nuai khat zelah mi 933 endik ang a ni.

January-June, 2023 (thla ruk) chhungin Mizoramah TB vangin mi 62 an thi a, TB vei zinga 83% erawh chu enkawl dam an ni thung. TB vei zingah HIV vei tel 12% an awm bawk.

Kumina thla 10 chhungin MDR-TB (Multi­drug-resistant TB) vei mi 122 hmuh chhuah zinga 70% chu enkawl dam an ni.

Hetih lai hian, Pradhan Mantri TB Mukt Bharat Abhiyaan hnuaia TB damlote chhawmdawlna petu mi 274 an awm tawh a, chawṭha (food basket) 2,373 sem chhuah a ni tawh.

Nimina review meeting hi Health secretary Esther Lalruatkimi'n a kaihruai a; Health department hotu te, School Education leh Social Welfare department leh MSACS hotu te, MHIP, HIV Network leh TB vei dam tawhte an tel. NHM mission director Dr Eric Zomawia'n ngaihtuah turte a sawifiah bakah, State TB officer Dr Febiola Kharkongor-in hmalakna a tarlang.

Esther Lalruatkimi chuan, TB tirêm turin theihtawpa hmalak ni mah se, chhan hrang hrang vangin TB vei an tlahniam chak tâwk lo tih a sawi a, "Pun lam a pan nia a lan avangin nasa zawka mipuiah zirtirna kan inpek nasat a pawimawh. TB vei mekte dinhmun chu thu hran ni ta se, a la kai ve lo mipuite'n a náwlpui ang pawha inven dan tur kan hriat chian leh zual a ṭul a ni," a ti.

Ṭhutkhawmah hian TB tihrêmna tura hmalakna thlir lêt a nih bakah, hmachhawp tihhlawhtlin dan tur sawiho a ni a; School Education department, Social Welfare department leh pawl dange nen TB donaa ṭanho dan tur ruahman a ni.