Serchhipa veng fai ber Vengchung
Serchhip district bawrhsap David Lalthantluanga hoin nimin khan a pisaah Serchhip khawpuia veng fai inelna result puan a ni a; Serchhipa veng fai berah Vengchung thlan a ni.
Serchhipa veng fai ber Vengchung VC hnenah lawmman Rs 20,000 hlan a ni a, pahnihna Chanmari VC hnenah Rs 10,000 leh pathumna Hmarveng VC leh P&E Veng VC hnenah Rs 5,000 ve ve hlan a ni.
Serchhip DC chuan, faina hapta, Swachta hi Seva hman chhungin faina lamah mipui leh sorkarin ṭan an lak nasat thu a sawi a, "Fai inelna ṭha taka kalpui a ni a, MJA-te'n tlawmngaih chhuahin endik hna an thawk a, lawmman la thei tur khawpa hmalatute zawng zawng chungah lawmthu ka sawi," a ti a, theihtawp chhuah chhunzawm turin Serchhip mipui a sáwm.
Swachhata hi Seva hi India ram pumah kumin September 15 aṭanga October 2, 2023 thleng hman a ni a; thupui chu 'Garbage free India' (Bawlhhlawh awm lohna India) tih a ni. Swachhata hi Seva puala Mizoram Cleanliness Week inbuatsaih nan Serchhip khawpuiah hian VC hrang hrangte'n fai inelna an nei a, Serchhip district MJA-te'n October 5-6, 2023 chhungin veng hrang hrang an endik a ni.