Tourism-a hmalak dan tur sawiho

Champhai bawrhsap James Lalrinchhana kaihhruaiin nimin khan DC conference hall-ah sorkar laipuia Ministry of Tourism hnuaia Swadesh Darshan 2.0 Scheme kaltlanga Champhai district-a tourism lama hmalak dan tur sawiho a ni. Cheng nuai 9,000 hmangin Tlangsam, Zotlang, Keilungliah, Vangchhia, Farkawn leh Dungtlangah hmalak tum a nih thu an tarlang.

Swadesh Darshan 2.0 Scheme kaltlang hian Mizoramah chuan Aizawl district leh Champhai district chu tourism lama hma­lakna atan thlan a nih thu sawiin James Lalrinchhana chuan, "Scheme kaltlang hian Champhai district-ah eizawnna thar tam tak a awm thei dawn a, a hlawhtlin theih nan sorkar, NGO, khawtlang hruaitute leh mipuite kawng hrang hranga kan lo inpuahchah lâwk a ṭul," a ti.

Ṭhutkhawmah hian sorkar department hrang hrang aiawh te, tlawmngai pawl aiawh te, hotel/guest house neitute an tel a; hmalak dan tur hrang hrang sawiho a ni.